Read nynorsk 2011 Jesaja 48 Bible Online

Jesaja 48 - nynorsk 2011 bible

Jesaja 48

¹ Høyr dette, Jakobs hus, de som blir kalla med Israels namn og er komne frå Judas kjelde, de som sver ved HERRENS namn og kallar på Israels Gud, men ikkje i sanning og rettferd!

² Dei kallar seg etter den heilage byen og støttar seg til Israels Gud. HERREN over hærskarane er hans namn.

³ Dei første ting har eg fortalt frå før. Frå min munn gjekk det ut, eg forkynte det. Brått handla eg, og det hende.

⁴ For eg veit at du er hard, med sener av jern i nakken og panne av bronse.

⁵Difor har eg fortalt det frå før, late deg få høyra det før det hende, så du ikkje skulle seia: «Gudebiletet mitt har gjort det, biletet eg har skore ut og støypt, har kravd det.»

⁶Du har høyrt det, sjå no alt saman! Kan ikkje de fortelja det? Frå no av lèt eg deg få høyra noko nytt, løynde ting som du ikkje veit om.

⁷No blir dei skapte, ikkje før. Du har ikkje høyrt om dei før i dag, så du ikkje skulle seia: «Sjå, eg visste det!»

⁸Du korkje høyrde eller visste det frå før, øyret ditt var ikkje ope for det. For eg veit kor trulaus du er, frå du var i mors liv vart du kalla ein syndar.

⁹For mitt namn skuld held eg att harmen min, for mi ære skuld legg eg band på meg og utryddar deg ikkje.

¹⁰ Sjå, eg har reinsa deg, men ikkje som sølv, eg har prøvd deg i lidings smelteomn.

¹¹ For mi skuld, for mi skuld handlar eg, elles ville eg bli vanæra! Mi ære gjev eg ikkje til nokon annan.

¹² Høyr på meg, Jakob, du Israel, som eg har kalla! Eg er Han. Eg er den første, eg er òg den siste.

¹³ Ja, mi hand har grunnlagt jorda, mi høgre hand har breidd himmelen ut. Eg kalla dei fram, og saman stod dei der.

¹⁴ [121] Kom saman, alle, og høyr! Kven blant dei har fortalt dette? Han som HERREN elskar, skal utføra hans vilje med Babel, hans arm er over kaldearane.

¹⁵Eg, eg har tala og kalla han, eg har sendt han og lèt han lukkast på vegen.

¹⁶ Kom hit til meg og høyr dette: Frå opphavs tid har eg aldri tala i det løynde, heilt frå det hende, var eg der. «No har Herren GUD sendt meg og sin Ande.»

¹⁷ Så seier HERREN, som løyser deg ut, Israels Heilage: Eg er HERREN, din Gud, som lærer deg kva som hjelper, og fører deg på vegen du skal gå.

¹⁸Ville du berre høyra på mine bod! Då vart freden din som elva, rettferda di som havsens bølgjer.

¹⁹ Då vart ætta di som sanden, etterkomarane dine som sandkorn, dei vart ikkje utrydda og namnet ikkje utsletta hos meg.

²⁰ Dra ut frå Babel, dra bort frå Kaldea! Fortel med jubelrop, lat det høyrast, bring det ut til enden av jorda. Sei: HERREN har løyst ut sin tenar Jakob.

²¹ Dei tørsta ikkje når han førte dei på aude stader, vatn frå berget lèt han strøyma fram for dei, han kløyvde fjellet, og vatnet fløymde ut.

²² Dei urettferdige har ingen fred, seier HERREN.