Read nynorsk 2011 Jesaja 59 Bible Online

Jesaja 59 - nynorsk 2011 bible

Jesaja 59

¹ Sjå, HERRENS hand er ikkje for kort til å frelsa, og øyret hans er ikkje for tungt til å høyra.

² Nei, det er skulda som skil mellom dykk og dykkar Gud. Syndene dykkar løyner andletet hans så han ikkje høyrer dykk.

³ For hendene dykkar er tilsølte med blod og fingrane av skuld, leppene dykkar talar løgn, og tunga mumlar svik.

⁴ Ingen stemner til doms med rette, og ingen fører sak på ærleg vis. Dei lit på tomleik og talar løgn, dei unnfangar urett og føder vondskap.

⁵Dei klekkjer ut ormeegg og vev spindelvev. Den som et av egga, døyr, blir dei knuste, blir det klekt ut ein slange.

⁶ Det dei vev, duger ikkje til klede, ingen kan kle seg i det dei lagar. Det dei gjer, er vondskaps gjerning, valdsverk kjem frå hendene deira.

⁷ Føtene deira spring etter vondskap, dei er raske til å ausa ut uskuldig blod. Dei legg vonde planar, der dei fer, er det herjing og øydelegging.

⁸Freds veg kjenner dei ikkje, det finst ingen rett i fotspora deira. Dei lagar seg krokvegar, den som går der, kjenner ikkje fred.

⁹ Difor er retten langt borte frå oss, rettferda når oss ikkje. Vi vonar på lys, men sjå, det er natt, på lysglans, men vi går i mørker.

¹⁰ Vi famlar langs veggen som blinde, famlar som om vi var utan auge. Vi snublar midt på dagen som om det var skumring, midt i livet er vi som døde.

¹¹ Vi brummar alle som bjørnar, vi klynkar som duer. Vi vonar på rett, men det finst ikkje, på frelse, men ho er langt borte frå oss.

¹² Våre mange brot er framfor deg, våre synder vitnar imot oss. For vi veit om våre brot, og vi kjenner vår skuld.

¹³ Vi har gjort opprør og fornekta HERREN, snudd oss bort frå vår Gud, tala om undertrykking og fråfall og brumma usanne ord som vi unnfanga i hjartet.

¹⁴ [133] Retten er driven tilbake, rettferda står langt borte. For sanninga har snubla på torget, og det som er rett, kjem ingen veg.

¹⁵ Sanninga er borte, den som vender seg frå det vonde, blir plyndra. HERREN såg det, og det var vondt i hans auge, for det fanst ingen rett.

¹⁶ Han såg ikkje nokon som kom til hjelp, han undra seg over at ingen greip inn. Men hans arm gav han siger, hans rettferd støtta han.

¹⁷ Han kledde seg i rettferd som brynje og sette frelses hjelm på hovudet. Han kledde seg i hemnens drakt og sveipte om seg lidenskapens kappe.

¹⁸Som gjerninga er, slik gjengjelder han: harme mot motstandarar, gjengjeld mot fiendar, mot fjerne kystar gjer han gjengjeld.

¹⁹ Dei skal frykta HERRENS namn i vest og hans herlegdom i aust. For han kjem som ein veldig flaum, HERRENS ande driv han fram.

²⁰ Ein som løyser ut, skal koma til Sion, til dei hos Jakob som vender om frå synd, seier HERREN.

²¹ Dette er mi pakt med dei, seier HERREN: Min Ande som er over deg, og mine ord som eg har lagt i din munn, skal ikkje vika frå din munn og ikkje frå munnen til borna og barneborna dine, seier HERREN, frå no og til evig tid.