Read nynorsk 2011 Jesaja 61 Bible Online

Jesaja 61 - nynorsk 2011 bible

Jesaja 61

¹ Herren GUDS ande er over meg, for HERREN har salva meg. Han har sendt meg for å forkynna ein god bodskap for hjelpelause, for å forbinda dei som har eit knust hjarte, ropa ut fridom for dei som er i fangenskap, og frigjering for dei som er bundne,

² for å ropa ut eit nådens år frå HERREN og ein hemnens dag frå vår Gud, for å trøysta alle som sørgjer,

³ og gje dei sørgjande i Sion turban i staden for oske, gledeolje i staden for sorg, lovsongsdrakt i staden for motlaus ånd. Dei skal kallast Rettferds eiketre som HERREN har planta for å syna sin herlegdom.

⁴ Dei skal byggja opp att gamle ruinar og gjenreisa det som før låg audt, dei skal byggja opp att ruinbyane som låg aude frå slekt til slekt.

⁵ Framande skal stå og gjeta småfeet for dykk, utlendingar skal vera bønder og vindyrkarar for dykk.

⁶ Men de skal kallast HERRENS prestar. Tenarar for vår Gud, skal de heita. De skal eta av rikdomen til folka og overta deira prakt.

⁷ Før hadde de dobbel skam og vanære. No skal dei jubla over sin del. Difor skal dei ha dobbel arv i landet, evig glede skal dei få.

⁸ For eg er HERREN, som elskar rett og hatar ran og urett. I truskap gjev eg dei løn og gjer ei evig pakt med dei.

⁹Ætta deira skal bli kjend mellom folkeslaga, etterkomarane deira mellom folka. Alle som ser dei, skal skjøna at dei er ei ætt som HERREN velsignar.

¹⁰ Eg gleder meg i HERREN, mi sjel jublar over min Gud. For han har kledd meg i frelsesklede og sveipt meg i rettferds kappe lik ein brudgom som set på seg presteleg turban, lik ei brur som pyntar seg med smykke.

¹¹ For som jorda lèt spirene veksa, som ein hage lèt frøa gro, så skal Herren GUD la rettferd og lovsong spira fram for alle folkeslag.