Read nynorsk 2011 Jesaja 64 Bible Online

Jesaja 64 - nynorsk 2011 bible

Jesaja 64

¹Ville du berre flerra himmelen og stiga ned så fjella dirra for deg, som når elden fatar i kvistene, som når elden får vatnet til å koka, for å læra dine motstandarar å kjenna ditt namn! Folkeslag skulle skjelva for ditt andlet

² når du gjorde skremmande gjerningar vi ikkje venta, og steig ned så fjella dirra for deg.

³ Aldri har nokon høyrt eller lytta til, aldri har noko auge sett nokon annan gud enn deg som kan gjera slikt for dei som ventar på han.

⁴Du møter den som er glad og gjer rett, dei som hugsar deg og går dine vegar. Sjå, du vart harm når vi synda i gamle dagar, men vi vart frelste.

⁵ Alle vart vi som ureine, all vår rettferd som ureint tøy. Vi visna alle som lauv, vår skuld tek oss bort som ein vind.

⁶Det er ingen som kallar på ditt namn, som vaknar opp og held fast ved deg. For du har løynt andletet for oss og gjeve oss over til vår skuld.

⁷ Men no, HERRE, er du vår far! Vi er leira, du han som formar oss, alle er vi verk av di hand.

⁸ HERRE, ver ikkje harm, hugs ikkje vår skuld for alltid! Sjå no hit, alle er vi ditt folk!

⁹ Dine heilage byar har vorte til ørken, Sion har vorte ein ørken og Jerusalem ei øydemark.

¹⁰ Vårt heilage og herlege tempel, der fedrane våre lova deg, har elden svidd av. Alt vi var glade i, er lagt i ruinar.

¹¹Kan du tola dette, HERRE, teia og audmjuka oss så djupt?