Read nynorsk 2011 Jesaja 8 Bible Online

Jesaja 8 - nynorsk 2011 bible

Jesaja 8

¹[23] HERREN sa til meg: «Ta deg ei stor tavle og skriv på henne med ein vanleg griffel: Til Maher-Sjalal-Hasj-Bas.»

²Eg tok meg pålitelege vitne, presten Uria og Sakarja, son til Jeberekja.

³Så var eg saman med profetkvinna, og ho vart med barn og fekk ein son. Då sa HERREN til meg: «Gjev han namnet Maher-Sjalal-Hasj-Bas.

⁴For før guten har lært å seia far og mor, skal rikdomane frå Damaskus og krigsbyttet frå Samaria berast fram for kongen av Assur.»

⁵ HERREN tala igjen til meg og sa:

⁶ [24] Fordi dette folket foraktar Siloas vatn, som renn så stilt, og mistar motet for Resin og Remaljas son,

⁷sjå, difor lèt Herren Storelva stiga over dei med veldige vassmengder — assyrarkongen og all hans makt. Ho skal stiga over alle sine elvefar og gå over alle sine bredder,

⁸ [25] ho kjem inn over Juda, fløymer over og breier seg utover til ho når opp til halsen. Med sine utspente venger fyller ho landet ditt, så vidt som det er, Immanuel!

⁹ [26] Lat hærropet lyda, folkeslag, og bli slegne av skrekk! Lytt, alle fjerne land! Rust dykk til strid og bli slegne av skrekk, rust til strid og bli slegne av skrekk!

¹⁰ Legg ein plan, han skal slå feil! Sei eit ord, det skal ikkje slå til! For Gud er med oss.

¹¹For så sa HERREN til meg då handa hans greip meg fast og han åtvara meg mot å gå den vegen dette folket går:

¹² De skal ikkje seia «samansverjing» til alt dette folket kallar samansverjing! Det dei fryktar, skal ikkje de frykta og ikkje skjelva for.

¹³ HERREN over hærskarane, han skal de halda heilag. Han skal de frykta, og han skal de skjelva for.

¹⁴ Han skal vera ein heilagdom, ein snublestein og eit berg til fall for Israels to hus, ei snare og ei felle for dei som bur i Jerusalem.

¹⁵ Mange av dei skal snubla, dei skal falla og skamslå seg, gå i snara og bli fanga.

¹⁶ [27] Eg vil binda inn vitnemålet og forsegla lova hos læresveinane mine.

¹⁷ Så vil eg venta på HERREN, som løyner andletet for Jakobs hus, og setja mi von til han.

¹⁸ [28] Sjå, eg og borna som HERREN har gjeve meg, er teikn og varsel i Israel frå HERREN over hærskarane, han som bur på Sion-fjellet.

¹⁹Men når dei seier til dykk: «Spør gjenferd og spådomsånder til råds, slike som kviskrar og mumlar! Skal ikkje eit folk spørja sine gudar, spørja dei døde til råds for dei levande

²⁰ om lov og om vitnemål?» Sanneleg, for dei som seier slikt, står ikkje sola opp meir!

²¹ Forkomen og svolten skal han dra omkring. Når han svelt, blir han harm og forbannar sin konge og sin Gud. Anten han vender seg mot det høge

²² eller ser utover jorda, er det naud og natt, trengsle og mørker. I mørkret er han støytt ut.