Read nynorsk 2011 3. Mosebok 18 Bible Online

3. Mosebok 18 - nynorsk 2011 bible

3. Mosebok 18

¹ HERREN sa til Moses:

²Tal til israelittane og sei til dei: Eg er HERREN dykkar Gud.

³De skal ikkje gjera som dei gjer i Egypt, det landet der de har budd, eller som dei gjer i Kanaan, det landet eg fører dykk til. De skal ikkje følgja deira forskrifter.

⁴Mine lover skal de halda, og mine forskrifter skal de akta på, så de følgjer dei. Eg er HERREN dykkar Gud.

⁵De skal halda forskriftene og lovene mine. Det mennesket som lever etter dei, skal ha liv ved dei. Eg er HERREN.

⁶[29] Ingen må koma nær nokon av sitt eige kjøt og blod for å kle dei nakne. Eg er HERREN.

⁷Du skal ikkje kle far din eller mor di naken. Ho er mor di; du skal ikkje kle henne naken.

⁸Du skal ikkje kle kona til far din naken; nakenskapen hennar høyrer far din til.

⁹Du skal ikkje kle syster di naken, anten ho er dotter til far din eller til mor di, anten ho er fødd heime eller ute.

¹⁰Du skal ikkje kle sonedotter di eller dotterdotter di naken, for det ville føra skam over deg sjølv.

¹¹Du skal ikkje kle dotter til kona til far din naken, ho som òg er dotter til far din. Ho er syster di.

¹²Du skal ikkje kle syster til far din naken. Ho er i nær slekt med han.

¹³Du skal ikkje kle syster til mor di naken. Ho er i nær slekt med henne.

¹⁴Du skal ikkje kle farbror din naken. Kona hans må du ikkje koma nær, ho er tanta di.

¹⁵Du skal ikkje kle svigerdotter di naken. Ho er kona til son din. Du skal ikkje kle henne naken.

¹⁶Du skal ikkje kle kona til bror din naken; nakenskapen hennar høyrer bror din til.

¹⁷Du skal ikkje kle både ei kvinne og dotter hennar nakne. Du skal ikkje ta sonedotter eller dotterdotter hennar og kle dei nakne, dei er av same kjøt og blod som henne. Det er skamlaus gjerning.

¹⁸Du skal ikkje ta ei kvinne som medkone for syster si og kle henne naken, ikkje så lenge den andre er i live.

¹⁹Når ei kvinne er urein med menstruasjon, skal du ikkje koma nær henne for å kle henne naken.

²⁰Du skal ikkje ha samleie med kona til ein landsmann og gjera deg urein ved henne.

²¹Du skal ikkje gje nokon av borna dine over til Molok; du skal ikkje vanhelga namnet til din Gud. Eg er HERREN.

²²Du skal ikkje liggja med ein mann som ein ligg med ei kvinne. Det er avskyeleg.

²³Du skal ikkje ha samleie med eit dyr av noko slag og gjera deg urein ved det. Heller ikkje skal ei kvinne by seg fram til eit dyr og para seg med det. Det er motbydeleg.

²⁴Gjer dykk ikkje ureine med noko slikt! For dei folkeslaga som eg vil driva ut for dykk, har gjort seg ureine med alt dette.

²⁵Landet har vorte ureint. Eg straffa det for synda så landet spydde ut dei som budde der.

²⁶Men de skal halda forskriftene og lovene mine og ikkje gjera nokon av desse avskyelege gjerningane, anten de er fødde i landet eller er innflyttarar der.

²⁷For dei som budde i landet før dykk, gjorde alle desse avskyelege gjerningane, og landet vart ureint.

²⁸Då må ikkje landet spy dykk ut fordi de gjer det ureint, slik det har spydd ut det folkeslaget som var der før dykk.

²⁹For alle som gjer noko av dette som er avskyeleg, skal støytast ut frå folket sitt.

³⁰Så hald dykk då til det som eg har fastsett, og følg ikkje nokon av dei avskyelege forskriftene som dei har følgt før dykk! Gjer dykk ikkje ureine ved dei! Eg er HERREN dykkar Gud.