Read nynorsk 2011 3. Mosebok 22 Bible Online

3. Mosebok 22 - nynorsk 2011 bible

3. Mosebok 22

¹ HERREN sa til Moses:

²Sei til Aron og sønene hans at dei skal vera varsame med dei heilage gåvene som israelittane vier til meg, så dei ikkje vanhelgar mitt heilage namn. Eg er HERREN.

³Du skal seia til dei: Dersom nokon av etterkomarane dykkar, i slekt etter slekt, kjem nær dei heilage gåvene som israelittane vier til HERREN, medan han er urein, skal han støytast bort frå mitt andlet. Eg er HERREN.

⁴Ingen av Arons etterkomarar som har hudsjukdom eller utflod, skal eta av dei heilage gåvene før han har vorte rein. Det skal heller ikkje den som kjem nær nokon som har vorte urein av lik, eller den det går sæd frå,

⁵eller den som kjem nær noko krypdyr som ein blir urein av, eller noko menneske som ein på eit eller anna vis blir urein av.

⁶Den som kjem nær noko slikt, er urein heilt til kvelds, og han skal ikkje eta av dei heilage gåvene før han har vaska heile kroppen sin i vatn.

⁷Når sola glader, er han rein. Sidan kan han eta av dei heilage gåvene, for det er maten hans.

⁸Dyr som er sjølvdaude eller ihelrivne, skal han ikkje eta, for då blir han urein. Eg er HERREN.

⁹Dei skal halda seg etter det som eg har fastsett, så dei ikkje påfører seg skuld og døyr fordi dei vanhelgar det som er heilagt. Eg er HERREN, som helgar dei.

¹⁰Ingen uvigsla skal eta det som er heilagt. Den som held til hos presten eller er leigekar hos han, skal ikkje eta det som er heilagt.

¹¹Men når ein prest kjøper ein slave som sin eigedom for pengar, då kan slaven eta av det heilage; dei som er fødde i huset hans, kan eta av maten hans.

¹²Når ei prestedotter gifter seg med ein uvigsla, må ho ikkje eta av dei heilage offergåvene.

¹³Men blir ho enkje eller fråskild og ikkje har born, og ho så kjem tilbake til farshuset sitt, då kan ho eta av maten hans som då ho var ung. Men ingen uvigsla må eta av den maten.

¹⁴Når ein mann av vanvare et noko heilagt, skal han betala presten for det heilage og leggja til ein femtedel.

¹⁵Prestane skal ikkje vanhelga dei heilage gåvene som israelittane gjev til HERREN,

¹⁶og føra synd og skuld over folket ved å la dei eta dei heilage gåvene. For eg er HERREN, som helgar dei.

¹⁷ HERREN sa til Moses:

¹⁸Tal til Aron og sønene hans og til alle israelittane og sei: Når ein israelitt eller ein av innflyttarane i Israel ber fram eit offer, anten det er eit lovnadsoffer eller eit frivillig offer dei ber fram for HERREN som brennoffer,

¹⁹må det vera slik at de kan vinna velvilje: Det skal vera eit feilfritt hanndyr av storfeet, sauene eller geitene.

²⁰Noko som har ein feil, må de ikkje ofra, for noko slikt vil ikkje gje dykk velvilje.

²¹Når nokon ber fram for HERREN eit fredsoffer av storfeet eller småfeet, anten det er ein lovnad han vil oppfylla, eller det er eit frivillig offer, då må det vera eit feilfritt dyr om det skal vinna velvilje. Det må ikkje finnast feil på dyret.

²²De må ikkje ofra til HERREN eit dyr som er blindt eller har brote eit bein eller lid av byllar, skabb eller anna utslett. De skal ikkje leggja gåveoffer av slike dyr på altaret for HERREN.

²³Ein okse eller sau som har for lange eller for korte lemer, kan du ofra som frivillig offer, men som eit lovnadsoffer blir det ikkje teke imot med velvilje.

²⁴Dyr som har fått testiklane klemde eller knuste, rivne eller skorne, skal de ikkje ofra til HERREN. Slikt må de ikkje gjera i dykkar land.

²⁵Heller ikkje skal de kjøpa slike dyr av utlendingar og bera dei fram som mat for dykkar Gud. Dei er skadde; det er ein feil på dei. De kan ikkje vinna velvilje ved dei.

²⁶ HERREN sa til Moses:

²⁷Når ein kalv eller eit lam eller eit kje kjem til, skal dei følgja mor si i sju dagar. Men frå den åttande dagen blir dei mottekne med velvilje som gåveoffer for HERREN.

²⁸De skal ikkje slakta storfeet og småfeet saman med ungane deira same dagen.

²⁹Når de slaktar eit takkoffer for HERREN, skal de ofra slik at de kan vinna velvilje.

³⁰De skal eta det same dagen og ikkje la noko av det bli liggjande til morgonen etter. Eg er HERREN.

³¹Så hald då boda mine og lev etter dei! Eg er HERREN.

³²Vanhelga ikkje mitt heilage namn, for eg skal haldast heilag mellom israelittane. Eg er HERREN, som helgar dykk.

³³Det var eg som førte dykk ut frå Egypt og vil vera dykkar Gud. Eg er HERREN.