Read nynorsk 2011 3. Mosebok 23 Bible Online

3. Mosebok 23 - nynorsk 2011 bible

3. Mosebok 23

¹ HERREN sa til Moses:

²Tal til israelittane og sei til dei: Dette er HERRENS høgtider, mine fastsette tider då de skal kalla saman til heilage samlingar.

³I seks dagar kan det arbeidast, men den sjuande dagen skal vera sabbat, ein kviledag med heilag samling. Då må de ikkje gjera noko arbeid. Det skal vera sabbat for HERREN alle stader der de bur.

⁴Dette er HERRENS høgtider, dei fastsette tidene då de skal kalla inn til heilage samlingar.

⁵Den fjortande dagen i den første månaden, i skumringa, er det påske for HERREN.

⁶Og den femtande dagen i same månaden er det høgtida med usyra brød for HERREN. I sju dagar skal de eta usyra brød.

⁷Den første dagen skal de halda ei heilag samling. Då må de ikkje gjera noko arbeid.

⁸Alle sju dagane skal de bera fram gåveoffer for HERREN. Den sjuande dagen skal de òg halda ei heilag samling. Då må de ikkje gjera noko arbeid.

⁹ HERREN sa til Moses:

¹⁰Tal til israelittane og sei til dei: Når de kjem inn i det landet eg vil gje dykk, og skjer kornet der, då skal de gå til presten med det første kornbandet de har skore.

¹¹Han skal svinga det for HERRENS andlet så de kan vinna velvilje. Dagen etter sabbaten skal presten svinga kornbandet.

¹²Den dagen de svingar kornbandet, skal de bera fram eit årsgammalt lam utan feil som brennoffer for HERREN

¹³[32] og grødeofferet som høyrer til. Det skal vera to tiandedels mål fint mjøl blanda med olje. Det er eit gåveoffer for HERREN til godange. Drikkofferet skal vera ein fjerdedels hin vin.

¹⁴De skal ikkje eta brød og ikkje steikt eller friskt korn før den dagen de ber fram offergåva til dykkar Gud. Det skal vera ei evig forskrift for dykk gjennom alle slekter, kvar de så bur.

¹⁵Frå dagen etter sabbaten, frå den dagen de kjem med kornbandet som skal svingast, skal de telja sju fulle veker.

¹⁶De skal telja femti dagar, til dagen etter den sjuande sabbaten. Då skal de bera fram for HERREN eit grødeoffer av den nye grøda.

¹⁷Frå bustadene dykkar skal de ta med to brød som skal svingast. Dei skal lagast av to tiandedels mål fint mjøl og bakast med surdeig. Det er førstegrøda for HERREN.

¹⁸Attåt brødet skal de bera fram sju årsgamle lam utan feil, ein ung okse og to vêrar som skal vera brennoffer for HERREN, og grødeofferet og drikkoffera som høyrer til. Det er eit gåveoffer til godange for HERREN.

¹⁹Så skal de ofra ein geitebukk som syndoffer og to årsgamle lam som fredsoffer.

²⁰Presten skal svinga dei to lamma for HERRENS andlet saman med brøda av førstegrøda. Det er eit svingeoffer for HERRENS andlet. Det skal vera vigd til HERREN og høyra presten til.

²¹Same dagen skal de kalla inn til samling, ei heilag samling skal det vera for dykk. Då må de ikkje gjera noko arbeid. Dette skal vera ei evig forskrift for dykk gjennom alle slekter, kvar de så bur.

²²Når de haustar inn kornet i landet, skal du ikkje skjera kornet heilt ut til åkerkanten, og dei aksa som ligg att når du har hausta, skal du ikkje sanka inn. Du skal la dei liggja til dei fattige og innflyttarane. Eg er HERREN dykkar Gud.

²³ HERREN sa til Moses:

²⁴Tal til israelittane og sei: Den første dagen i den sjuande månaden skal de halda kviledag. Då skal de blåsa i horn og minna om den heilage samlinga.

²⁵Den dagen må de ikkje gjera noko arbeid, og de skal bera fram gåveoffer for HERREN.

²⁶ HERREN sa til Moses:

²⁷Merk dykk den tiande dagen i denne sjuande månaden, soningsdagen. Det skal vera ei heilag samling for dykk, de skal audmjuka dykk og bera fram gåveoffer for HERREN.

²⁸Den dagen må de ikkje gjera noko arbeid, for det er soningsdag. Då skal det gjerast soning for dykk for HERREN dykkar Guds andlet.

²⁹Kvar den som ikkje audmjukar seg den dagen, skal støytast ut frå folket sitt.

³⁰Og kvar den som gjer noko arbeid den dagen, vil eg rydda ut av folket.

³¹De skal ikkje gjera noko arbeid. Det skal vera ei evig forskrift for dykk gjennom alle slekter, kvar de så bur.

³²Ein sabbat, ein kviledag, skal det vera for dykk, og de skal audmjuka dykk. Frå kvelden den niande dagen i den månaden, frå den kvelden til den neste, skal de halda kviledag.

³³ HERREN sa til Moses:

³⁴Tal til israelittane og sei: Frå den femtande dagen i denne sjuande månaden skal de halda lauvhyttefest for HERREN i sju dagar.

³⁵Den første dagen skal det vera ei heilag samling. Då må de ikkje gjera noko arbeid.

³⁶Sju dagar skal de bera fram gåveoffer for HERREN. Den åttande dagen skal de halda ei heilag samling og bera fram gåveoffer for HERREN. Då er det høgtidssamling, og de må ikkje gjera noko arbeid.

³⁷Dette er HERRENS høgtider då de skal kalla inn til heilage samlingar. De skal bera fram gåveoffer for HERREN, brennoffer og grødeoffer, slaktoffer og drikkoffer, kvar dag det som høyrer den dagen til.

³⁸I tillegg kjem HERRENS sabbatar, gåvene og lovnadsoffera dykkar og dei frivillige offera som de gjev HERREN.

³⁹Merk dykk den femtande dagen i den sjuande månaden, når de samlar inn grøda i landet. Då skal de feira HERRENS høgtid i sju dagar. Den første dagen skal vera kviledag, og den åttande dagen skal vera kviledag.

⁴⁰Den første dagen skal de ta frukt av edle tre, palmeblad, greiner av lauvtre og av piletre ved bekkene, og de skal gleda dykk i sju dagar for HERREN dykkar Guds andlet.

⁴¹Kvart år skal de feira høgtid for HERREN i sju dagar. Det skal vera ei evig forskrift for dykk gjennom alle slekter. I den sjuande månaden skal de feira denne høgtida.

⁴²Då skal de bu i lauvhytter i sju dagar. Alle som er fødde i Israel, skal bu i lauvhytter,

⁴³så etterkomarane dykkar skal vita at eg lét israelittane bu i hytter då eg førte dei ut frå Egypt. Eg er HERREN dykkar Gud.

⁴⁴Moses kunngjorde HERRENS høgtider for israelittane.