Read nynorsk 2011 3. Mosebok 3 Bible Online

3. Mosebok 3 - nynorsk 2011 bible

3. Mosebok 3

¹[9] Dersom offergåva hans er eit fredsoffer, og han tek det av storfeet, skal han ofra for HERRENS andlet eit dyr utan feil, anten hann eller ho.

²Han skal leggja handa på hovudet til offeret og slakta det innmed inngangen til teltheilagdomen, og Arons søner, prestane, skal stenka blodet rundt om på altaret.

³Av fredsofferet skal han bera fram som gåveoffer for HERREN feittet på og rundt innvolane,

⁴begge nyrene med talgen innmed hoftemusklane, og leverlappen, som han skal ta ut saman med nyrene.

⁵Sønene til Aron skal la det gå opp i røyk på altaret saman med brennofferet som ligg på veden over elden, eit gåveoffer til godange for HERREN.

⁶Dersom det er av småfeet han ofrar eit fredsoffer til HERREN, skal det vera eit dyr utan feil, anten hann eller ho.

⁷Dersom det er ein sau han ofrar, skal han leia han fram for HERRENS andlet,

⁸leggja handa på hovudet til offeret og slakta det framfor teltheilagdomen, og Arons søner skal stenka blodet rundt om på altaret.

⁹Av fredsofferet skal han bera fram feittet som gåveoffer for HERREN, heile feitthalen, som han skal skjera tett innmed ryggbeinet, feittet som dekkjer innvolane,

¹⁰begge nyrene med talgen innmed hoftemusklane, og leverlappen, som han skal ta ut saman med nyrene.

¹¹Presten skal la det gå opp i røyk på altaret som gåveoffer for HERREN.

¹²Dersom offergåva hans er ei geit, skal han leia henne fram for HERRENS andlet,

¹³leggja handa på hovudet hennar og slakta henne framfor teltheilagdomen, og Arons søner skal stenka blodet hennar rundt om på altaret.

¹⁴Av offergåva skal han bera fram som gåveoffer for HERREN feittet som er på og rundt innvolane,

¹⁵begge nyrene med talgen innmed hoftemusklane, og leverlappen, som han skal ta ut saman med nyrene.

¹⁶Presten skal la det gå opp i røyk på altaret. Det er eit gåveoffer til godange for HERREN. Alt feitt høyrer HERREN til.

¹⁷Dette er ei evig forskrift for dykk gjennom alle slekter, kvar de så bur. Feitt og blod må de aldri eta.