Read nynorsk 2011 3. Mosebok 9 Bible Online

3. Mosebok 9 - nynorsk 2011 bible

3. Mosebok 9

¹På den åttande dagen kalla Moses til seg Aron og sønene hans og dei eldste i Israel.

²Han sa til Aron: «Ta ein oksekalv til syndoffer og ein vêr til brennoffer, begge utan feil. Lei dei fram for HERRENS andlet.

³Sei så til israelittane: Ta ein geitebukk til syndoffer, ein kalv og eit lam til brennoffer, årsgamle og utan feil,

⁴ein okse og ein vêr til fredsoffer som skal ofrast for HERRENS andlet, og så eit grødeoffer med olje i. For i dag vil HERREN syna seg for dykk.»

⁵Dei tok med seg det som Moses hadde gjeve påbod om, fram til teltheilagdomen. Så steig heile forsamlinga fram og stod for HERRENS andlet.

⁶Då sa Moses: «Dette er det HERREN har bode dykk å gjera, slik at HERRENS herlegdom skal syna seg for dykk.»

⁷Og Moses sa til Aron: «Du skal gå fram til altaret og ofra syndofferet og brennofferet ditt og gjera soning for deg sjølv og for folket! Ber så fram offeret frå folket og gjer soning for dei, som HERREN har gjeve påbod om!»

⁸Så gjekk Aron fram til altaret og slakta kalven som var syndoffer for han sjølv.

⁹Arons søner bar fram blodet til han, og han dyppa fingeren i blodet og strauk det på altarhorna. Resten av blodet helte han ut nedmed altarfoten.

¹⁰Feittet, nyrene og leverlappen av syndofferdyret lét han gå opp i røyk på altaret, slik som HERREN hadde pålagt Moses.

¹¹Men kjøtet og skinnet brende han opp utanfor leiren.

¹²Så slakta han brennofferet. Arons søner gav han blodet, og han stenka det rundt om på altaret.

¹³Dei gav han sjølve brennofferet, stykke for stykke og med hovudet, og han lét det gå opp i røyk på altaret.

¹⁴Innvolane og beina vaska han og brende dei på altaret saman med brennofferet.

¹⁵Så bar han fram offeret frå folket. Han tok bukken som var syndoffer for folket, slakta han og ofra han som syndoffer på same måten som den første.

¹⁶Han bar fram brennofferet og gjorde slik det var fastsett.

¹⁷Grødeofferet bar han òg fram. Han tok ei handfull av det og lét det gå opp i røyk på altaret, i tillegg til morgonbrennofferet.

¹⁸Han slakta oksen og vêren som var fredsoffer for folket. Sønene hans gav han blodet, og han stenka det rundt om på altaret.

¹⁹Feittet på oksen og vêren, både feitthalen, feittet som dekte innvolane, begge nyrene og leverlappen,

²⁰alt dette la dei på bryststykka. Aron lét feittet gå opp i røyk på altaret.

²¹Men bryststykka og det høgre låret svinga han som eit svingeoffer for HERRENS andlet, slik som Moses hadde gjeve påbod om.

²²Aron lyfte hendene over folket og velsigna dei. Så gjekk han ned, etter at han hadde bore fram syndofferet, brennofferet og fredsofferet.

²³Sidan gjekk Moses og Aron inn i teltheilagdomen. Då dei kom ut att, velsigna dei folket, og HERRENS herlegdom synte seg for heile folket.

²⁴Det fór ut eld frå HERREN og brende opp det som var på altaret, både brennofferet og feittet. Då folket såg det, ropa dei høgt av glede og kasta seg ned med andletet mot jorda.