Read nynorsk 2011 Jeremia 1 Bible Online

Jeremia 1 - nynorsk 2011 bible

Jeremia 1

¹Ord av Jeremia, son til Hilkia, ein av prestane i Anatot i Benjamin-landet.

²HERRENS ord kom til han i dei dagane då Josjia, son til Amon, var konge i Juda, i det trettande styringsåret hans,

³og i dei dagane då Jojakim, son til Josjia, var konge i Juda, heilt til slutten av det ellevte året då Sidkia, son til Josjia, var konge i Juda, då Jerusalem vart ført i eksil i den femte månaden.

⁴ HERRENS ord kom til meg:

⁵ «Før eg forma deg i mors liv, kjende eg deg, før du vart fødd, helga eg deg, til profet for folkeslaga sette eg deg.»

⁶Men eg sa: «Å, min Herre og GUD! Sjå, eg kan ikkje tala, eg er for ung!»

⁷Då sa HERREN til meg: «Du skal ikkje seia: Eg er ung! Overalt der eg sender deg, skal du gå, og alt eg byd deg, skal du seia.

⁸ Ver ikkje redd dei, eg er med deg og skal berga deg, seier HERREN.»

⁹HERREN rette ut handa og rørte ved munnen min. Så sa HERREN til meg: «No legg eg orda mine i din munn.

¹⁰ Sjå, eg set deg i dag over folk og rike til å rykkja opp og riva ned, til å øydeleggja og knusa, til å byggja og planta.»

¹¹[1] HERRENS ord kom til meg: «Kva ser du, Jeremia?» Eg svara: «Eg ser ei grein av eit vaketre.»

¹²Då sa HERREN til meg: «Godt sett! For eg vil vaka over mitt ord og setja det i verk.»

¹³ HERRENS ord kom til meg for andre gong: «Kva ser du?» Eg svara: «Eg ser ei kokande gryte, ho hallar hit frå nord.»

¹⁴[2] Då sa HERREN til meg: Frå nord skal ulukka hellast ut over alle som bur i landet.

¹⁵ For no kallar eg på alle kongeslektene i nord, seier HERREN. Dei skal koma og reisa kvar si trone ved Jerusalems portopningar, mot alle murane ikring og mot alle byane i Juda.

¹⁶ Då vil eg seia min dom over dei for all deira vondskap, dei som forlét meg, tende offereld for andre gudar og tilbad verk av eigne hender.

¹⁷Men du skal spenna beltet om livet, stå fram og seia til dei alt det eg byd deg. Ver ikkje redd dei, elles slår eg deg med redsle for dei.

¹⁸ Sjå, eg gjer deg i dag til ein festningsby, til ei jernstøtte og ein bronsemur mot heile landet, mot kongane i Juda, mot leiarane og prestane og folket i landet.

¹⁹Dei skal gå til krig mot deg, men ikkje vinna. For eg er med deg, seier HERREN. Eg skal berga deg.