Read nynorsk 2011 Jeremia 37 Bible Online

Jeremia 37 - nynorsk 2011 bible

Jeremia 37

¹Sidkia, son til Josjia, vart konge etter Konja, son til Jojakim. Kong Nebukadnesar av Babel gjorde han til konge i Juda.

²Korkje Sidkia eller tenarane hans eller folket i landet ville høyra på dei orda HERREN tala gjennom profeten Jeremia.

³Kong Sidkia sende Jehukal, son til Sjelemja, og presten Sefanja, son til Maaseja, til profeten Jeremia for å seia: «Bed for oss til HERREN vår Gud!»

⁴På den tid var Jeremia fri til å gå ut og inn mellom folk; dei hadde endå ikkje sett han i fengsel.

⁵[78] No hadde faraos hær drege ut frå Egypt. Kaldearane som kringsette Jerusalem, fekk høyra om det og braut opp frå byen.

⁶Då kom HERRENS ord til profeten Jeremia:

⁷Så seier HERREN, Israels Gud: Dette skal de seia til Juda-kongen, som har sendt dykk for å spørja meg til råds: Sjå, faraos hær, som har fare ut for å hjelpa dykk, vil venda attende til sitt land, til Egypt.

⁸Og så kjem kaldearane att og går til strid mot denne byen. Dei kjem til å ta han og brenna han.

⁹Så seier HERREN: De må ikkje narra dykk sjølve og seia: «Kaldearane dreg sikkert bort frå oss.» For det gjer dei ikkje.

¹⁰Om de slo heile kaldearhæren som går til strid mot dykk, og det berre var att nokre hardt såra, kom dei til å reisa seg, kvar frå sitt telt, og brenna ned denne byen.

¹¹Då kaldearhæren hadde trekt seg tilbake frå Jerusalem på grunn av hæren til farao,

¹²gjekk Jeremia ut av Jerusalem for å gå til Benjamin-landet. Han skulle ordna med ein arv mellom folket der.

¹³Men då han kom til Benjamin-porten, møtte han ein vakthavande offiser som heitte Jeria, son til Sjelemja, Hananjas son. Han greip profeten Jeremia og sa: «Du vil gå over til kaldearane!»

¹⁴«Det er løgn!» sa Jeremia. «Eg vil ikkje gå over til kaldearane.» Men Jeria høyrde ikkje på han. Han tok Jeremia og førte han til leiarane.

¹⁵Dei vart sinte på Jeremia, dei slo han og førte han som fange til huset til riksskrivaren Jonatan, for det hadde dei gjort om til fengsel.

¹⁶Slik kom Jeremia i fangeholet i kjellaren, og der vart han sitjande i lang tid.

¹⁷Kong Sidkia sende så bod og henta han til slottet og spurde han i løynd: «Er det kome noko ord frå HERREN?» «Det er det», svara Jeremia. «Du skal gjevast i hendene på kongen av Babel.»

¹⁸Så sa Jeremia til kong Sidkia: «Kva synd har eg gjort mot deg og tenarane dine og dette folket sidan de har sett meg i fengsel?

¹⁹Og kvar er no profetane dykkar, dei som profeterte at kongen av Babel ikkje ville gå mot dykk og dette landet?

²⁰Høyr no, herre konge! Lat mi bøn koma fram for deg! Send meg ikkje tilbake til riksskrivaren Jonatans hus, og lat meg ikkje døy der!»

²¹Då sa kong Sidkia frå om at dei skulle halda Jeremia i varetekt i vaktgarden. Der fekk han kvar dag brød frå Bakargata, heilt til det var slutt på brød i byen. Og Jeremia vart sitjande der i vaktgarden.