Read nynorsk 2011 Jeremia 39 Bible Online

Jeremia 39 - nynorsk 2011 bible

Jeremia 39

¹Det var då Jerusalem vart teken. [1] I det niande året Sidkia var konge i Juda, i den tiande månaden, kom kong Nebukadnesar av Babel til Jerusalem med heile hæren sin og kringsette byen.

²I Sidkias ellevte år, på den niande dagen i den fjerde månaden, braut dei gjennom bymuren.

³[80] Då kom alle Babel-kongens embetsmenn og tok sete i Midtporten: Nergal Sar-eser av Samgar-Nebu, Sar-sekim Rab-saris, Nergal Sar-eser Rab-mag og alle dei andre embetsmennene til kongen av Babel.

⁴[81] Juda-kongen Sidkia og alle krigarane hans fekk auge på dei og rømde. Dei forlét byen om natta gjennom kongens hage ved porten mellom dei to murane. Han tok vegen mot Araba-sletta.

⁵[82] Men kaldearhæren sette etter dei og nådde Sidkia att på slettene ved Jeriko. Dei tok han til fange og førte han opp til Ribla i Hamat-landet, til Babel-kongen Nebukadnesar, som felte dommen over han.

⁶I Ribla drap kongen av Babel sønene til Sidkia medan han såg på. Kongen av Babel drap òg alle stormennene i Juda.

⁷Så stakk han ut auga på Sidkia og batt han med bronselenkjer for å føra han til Babel.

⁸Kaldearane brende både kongens slott og husa til folket, og murane kring Jerusalem reiv dei ned.

⁹Dei som var att i byen, og dei som hadde gått over til babylonarkongen, og dei som elles var att i folket, vart førte til Babel i eksil av Nebusaradan, sjefen for livvakta.

¹⁰Berre nokre av dei fattigaste i folket, dei som ingenting eigde, lét livvaktsjefen Nebusaradan vera att i Juda, og samstundes gav han dei vinmarker og åkrar.

¹¹Kong Nebukadnesar av Babel gav livvaktsjefen Nebusaradan denne ordren om Jeremia:

¹²«Ta han og hald auge med han. Du skal ikkje gjera han noko vondt, men det han sjølv bed om, skal du gjera med han.»

¹³Livvaktsjefen Nebusaradan, Nebusjasban Rab-saris, Nergal Sar-eser Rab-mag og alle stormennene til Babel-kongen

¹⁴[83] sende bod om at Jeremia skulle takast ut or vaktgarden. Dei gav han over til Gedalja, son til Ahikam, Sjafans son, som skulle ta han heim til seg. Så fekk han bu mellom folket.

¹⁵ HERRENS ord kom til Jeremia medan han sat fengsla i vaktgarden:

¹⁶Gå og sei til Ebed-Melek frå Kusj: Så seier HERREN over hærskarane, Israels Gud: Sjå, no oppfyller eg mitt ord om denne byen, til det vonde og ikkje til det gode. Det skal henda rett framfor auga på deg den dagen.

¹⁷Men eg vil berga deg på den dagen, seier HERREN. Du skal ikkje koma i hendene på dei mennene du er redd.

¹⁸Eg lèt deg sleppa unna. Du skal ikkje falla for sverd, men få livet som krigsbytte fordi du stola på meg, seier HERREN.