Read nynorsk 2011 Jeremia 52 Bible Online

Jeremia 52 - nynorsk 2011 bible

Jeremia 52

¹Sidkia var tjueein år gammal då han vart konge, og han styrte i Jerusalem i elleve år. Mor hans heitte Hamutal og var dotter til Jeremia frå Libna.

²Sidkia gjorde det som vondt var i HERRENS auge, i eitt og alt som Jojakim hadde gjort.

³Fordi HERREN var vreid på Jerusalem og Juda, gjekk det som det gjorde, og til sist kasta han dei bort frå sitt andlet. Sidkia gjorde opprør mot kongen av Babel.

⁴[120] Då drog Nebukadnesar med heile sin hær mot Jerusalem. Det var i det niande styringsåret til Sidkia, den tiande dagen i den tiande månaden. Dei slo leir utfor byen og bygde ein voll rundt han.

⁵Og byen var kringsett til kong Sidkias ellevte styringsår.

⁶[121] Den niande dagen i den fjerde månaden, då hungersnauda var som verst og folket ikkje hadde meir mat,

⁷braut fienden gjennom bymuren. Om natta flykta alle krigarane og forlét byen gjennom porten mellom dei to murane, ved kongens hage, endå kaldearane hadde kringsett byen. Og dei tok vegen mot Araba-sletta.

⁸Men kaldearhæren sette etter kong Sidkia og nådde han att på slettene ved Jeriko. Då hadde heile hæren flykta frå han og var spreidd.

⁹[122] Kongen vart gripen og ført opp til Ribla i Hamat-landet, til kongen av Babel, som felte dommen over han.

¹⁰Kongen av Babel drap sønene til Sidkia medan han såg på. Alle leiarane i Juda drap han òg der i Ribla.

¹¹Så stakk han ut auga på Sidkia. Kongen av Babel batt han med bronselenkjer og førte han til Babel. Der vart han halden i fengsel til sin døyande dag.

¹²[123] Den tiande dagen i den femte månaden — det var i det nittande styringsåret til Nebukadnesar — kom ein av dei fremste mennene til Babel-kongen til Jerusalem. Han heitte Nebusaradan og var sjef for livvakta.

¹³Nebusaradan sette HERRENS hus og kongeborga i brann. Alle husa og palassa i Jerusalem brende han opp.

¹⁴Og heile kaldearhæren som stod under kommandoen hans, reiv murane rundt Jerusalem.

¹⁵Så førte Nebusaradan i eksil nokre av dei fattigaste i folket og dei som var att i byen, og dei som hadde falle frå og gått over til Babel-kongen, og resten av handverkarane.

¹⁶Berre ein del av dei fattigaste i landet lét Nebusaradan vera att; dei skulle arbeida på vinmarkene og på åkrane.

¹⁷Kaldearane slo sund bronsesøylene i HERRENS hus, vognstativa og bronsehavet som stod der. All bronsen førte dei til Babel.

¹⁸Dei tok oskefata og eldskuffene, lysesaksene, offerskålene og røykjelsesskålene og alt utstyr av bronse som hadde vore i bruk i gudstenesta.

¹⁹Sjefen for livvakta tok òg med seg alt som var av gull og sølv: bollane og glopannene, offerskålene og oskefata, lysestakane, røykjelsesskålene og kannene til drikkofferet.

²⁰Dei to søylene, det eine havet, dei tolv bronseoksane under det og vognstativa som Salomo hadde laga til HERRENS hus — alle desse tinga inneheldt så mykje bronse at dei ikkje kunne vegast.

²¹[124] Begge søylene var atten alner høge og tolv alner i omkrins. Dei var fire fingrar tjukke og hole.

²²Begge hadde eit søylehovud av bronse, og kvart søylehovud var fem alner høgt. Rundt om på søylehovudet var det slyngornament av granateple, alt saman av bronse. Slik var begge søylene.

²³Nittiseks granateple hang fritt. I alt var det hundre granateple rundt om på slyngornamenta.

²⁴Sjefen for livvakta tok med seg øvstepresten Seraja og Sefanja, presten under han, og dei tre dørvaktarane.

²⁵Frå byen tok han med seg ein hoffmann som hadde tilsyn med krigarane, sju av kongens fremste tenestemenn som endå var i byen, dessutan skrivaren til hærføraren, han som skreiv ut folk i landet til krigsteneste, og seksti mann av folket elles som fanst i byen.

²⁶Alle desse tok Nebusaradan, sjefen for livvakta, med seg. Han førte dei til Babel-kongen i Ribla,

²⁷og kongen slo dei i hel der, i Ribla i Hamat-landet. Slik vart folket i Juda ført bort frå landet sitt.

²⁸Dette er folket som Nebukadnesar førte i eksil: i det sjuande styringsåret 3023 frå Juda,

²⁹i Nebukadnesars attande år 832 frå Jerusalem.

³⁰I Nebukadnesars tjuetredje år førte Nebusaradan, livvaktsjefen, 745 judearar i eksil. Til saman var det 4600 personar.

³¹[125] I det trettisjuande året etter at Juda-kongen Jojakin var bortført, den tjuesjuande dagen i den tolvte månaden i det året han sjølv vart konge, tok Babel-kongen Evil-Merodak Juda-kongen Jojakin til nåde og henta han ut or fengselet.

³²Han snakka venleg med han og gav han den fremste plassen mellom dei andre kongane som var hos han i Babel.

³³Jojakin fekk leggja av fangedrakta, og han åt alltid ved kongens bord så lenge han levde.

³⁴Sitt daglege brød fekk han av Babel-kongen, dag for dag så lenge han levde, til sin døyande dag.