Read nynorsk 2011 Jeremia 7 Bible Online

Jeremia 7 - nynorsk 2011 bible

Jeremia 7

¹Dette ordet kom til Jeremia frå HERREN:

²Still deg i porten til HERRENS hus. Der skal du ropa ut dette ordet og seia: Høyr HERRENS ord, heile Juda, de som går inn gjennom desse portane for å tilbe HERREN.

³Så seier HERREN over hærskarane, Israels Gud: Gjer vegane og gjerningane dykkar gode, så vil eg la dykk bu på denne staden.

⁴Stol ikkje på dei falske orda: «HERRENS tempel, HERRENS tempel, HERRENS tempel!»

⁵Men om de verkeleg gjer vegane og gjerningane dykkar gode, om de gjer rett mot kvarandre,

⁶ikkje undertrykkjer innflyttarar, farlause og enkjer, ikkje auser ut skuldlaust blod på denne staden og ikkje følgjer andre gudar til skade for dykk sjølve,

⁷då vil eg la dykk bu på denne staden, i det landet eg gav fedrane dykkar, frå evig tid og til evig tid.

⁸Sjå, de stolar på falske ord som ikkje kan hjelpa.

⁹De stel, slår i hel, bryt ekteskapet, sver falskt, tenner offereld for Baal og følgjer andre gudar som de ikkje kjenner.

¹⁰Og så vil de koma og stå for mitt andlet i dette huset som namnet mitt er ropa ut over, og seia: «Vi er berga», sjølv om de gjer alt dette avskyelege?

¹¹Har det vorte ei røvarhòle i dykkar auge, dette huset som namnet mitt er ropa ut over? Også eg kan sjå, seier HERREN.

¹²[22] Gå til staden min som er i Sjilo, der eg lét namnet mitt bu i den første tida, og sjå kva eg gjorde med han på grunn av vondskapen hos folket mitt, Israel.

¹³Og no har de gjort alle desse gjerningane, seier HERREN. De ville ikkje høyra når eg tala til dykk seint og tidleg, og de svara ikkje når eg ropa på dykk.

¹⁴Difor vil eg gjera slik eg gjorde med Sjilo, mot det huset som namnet mitt er ropa ut over, og som de stolar på, den staden eg gav dykk og fedrane dykkar.

¹⁵[23] Og eg vil kasta dykk bort frå mitt andlet slik eg kasta frå meg alle brørne dykkar, heile Efraims ætt.

¹⁶Du skal ikkje be for dette folket, ikkje bera fram klage eller bøn for det og ikkje prøva å overtala meg, for eg vil ikkje høyra på deg.

¹⁷Ser du ikkje kva dei driv på med i Judas byar og på Jerusalems gater?

¹⁸[24] Borna sankar ved, fedrane gjer opp eld, kvinnene knar deig for å baka offerkaker til Himmeldronninga, og dei auser ut drikkoffer til andre gudar. Slik krenkjer dei meg.

¹⁹Men er det meg dei krenkjer, seier HERREN, er det ikkje seg sjølv, er det ikkje deira eige andlet som får skamma over seg?

²⁰Difor seier Herren GUD: Sjå, min vreide og harme skal ausast ut over denne staden, over folk og fe, over trea på marka og frukta av jorda. Han skal brenna og ikkje slokna.

²¹Så seier HERREN over hærskarane, Israels Gud: Legg brennoffer til slaktoffera dykkar og et kjøt!

²²For eg sa ikkje noko om brennoffer og slaktoffer til fedrane dykkar, eg gav dei ikkje noko påbod om det då eg førte dei ut frå Egypt.

²³Men dette bodet gav eg dei: «Høyr på mi røyst, så skal eg vera dykkar Gud, og de skal vera mitt folk. Gå alltid på den vegen eg byd dykk, så skal det gå dykk vel.»

²⁴Men dei ville ikkje høyra og vende ikkje øyret til. Dei følgde sine eigne planar, sitt vonde og sjølvrådige hjarte. Dei gjekk bakover, ikkje framover.

²⁵Frå den tid då fedrane dykkar drog ut frå Egypt og heilt til denne dag har eg sendt alle mine tenarar profetane til dei, seint og tidleg.

²⁶Men dei ville ikkje høyra på meg og vende ikkje øyret til. Dei gjorde nakken stiv og var verre enn fedrane sine.

²⁷Når du seier alle desse orda til dei, kjem dei ikkje til å høyra på deg. Når du ropar til dei, kjem dei ikkje til å svara.

²⁸Då skal du seia til dei: «Dette er folkeslaget som ikkje ville lytta til HERREN sin Guds røyst og ikkje ta lærdom. Det er slutt på truskapen, han er borte frå deira munn.»

²⁹[25] Klipp håret av deg og kast det bort! Stem i ei likklage på dei snaue høgdene! HERREN har forkasta og vraka den slekta han er harm på.

³⁰For judearane har gjort det som er vondt i mine auge, seier HERREN. Dei har sett det motbydelege inn i det huset som namnet mitt er ropa ut over, og gjort det ureint.

³¹[26] Dei har bygd Tofet-haugane i Ben-Hinnom-dalen, der dei brenner sønene og døtrene sine i elden. Det har eg ikkje pålagt dei, det har aldri vore i mine tankar.

³²Difor, sjå, dagar skal koma, seier HERREN, då det ikkje lenger skal heita Tofet eller Ben-Hinnom-dalen, men Drapsdalen. Og i Tofet skal dei gravleggja folk, fordi det ikkje finst gravplass andre stader.

³³Lika av dette folket skal bli til føde for fuglane under himmelen og for dyra på jorda, og ingen skal skremma dei bort.

³⁴Eg gjer ende på lyden av jubel og glede og røysta til brudgom og brur i Judas byar og på Jerusalems gater. For landet skal leggjast i ruinar.