Read nynorsk 2011 Jeremia 9 Bible Online

Jeremia 9 - nynorsk 2011 bible

Jeremia 9

¹ Å, om hovudet mitt var vatn og auget mitt ei tårekjelde! Då ville eg gråta dag og natt over dei falne i folket, mi dotter.

² Å, om eg fann ein stad i ørkenen der ferdafolk kunne overnatta! Då ville eg forlata folket mitt og gå bort frå dei. For dei er alle ekteskapsbrytarar, ein flokk av trulause.

³ Dei spenner løgnbogen med tunga som pil. Det er ikkje ved sanning dei herskar i landet. Dei går frå vondskap til vondskap, og dei kjenner ikkje meg, seier HERREN.

⁴ Akta dykk for kvarandre, stol ikkje eingong på ein bror! Kvar bror fer med list, kvar ven går med sladder.

⁵ Dei lurer kvarandre og snakkar ikkje sant. Dei har lært opp tunga til å lyga, dei er utmatta av vondskap.

⁶Mellom svikarar bur du, svikarar som ikkje vil kjennast ved meg, seier HERREN.

⁷ Difor seier HERREN over hærskarane: Sjå, eg vil smelta dei og prøva dei. Kva kan eg elles gjera for folket, mi dotter?

⁸ Tunga deira er ei drepande pil, ho talar svik. Med munnen talar dei til nesten sin om fred, men i sitt indre planlegg dei bakhald.

⁹ Skulle eg ikkje straffa dei for dette, seier HERREN, skulle eg ikkje hemna meg på eit folkeslag som dette?

¹⁰ Eg set i med gråt og klagesong over fjella, likklage over beita i ørkenen. For dei er avsvidde, ingen ferdast der, det høyrest ingen rautande buskap. Både fuglane under himmelen og dyra på marka har rømt og er borte.

¹¹ Eg gjer Jerusalem til ei steinrøys, ein stad der sjakalar held til. Byane i Juda gjer eg til aude stader der ingen kan bu.

¹² Kven er så vis at han skjønar dette og kan kunngjera det HERRENS munn har tala til han? Kvifor er landet lagt i grus, avsvidd som ein ørken der ingen kan ferdast?

¹³ HERREN svara: Fordi dei sveik mi lov, som eg la fram for dei. Dei høyrde ikkje på mi røyst og følgde ikkje mi lov,

¹⁴ men dei følgde sitt sjølvrådige hjarte og Baal-gudane, slik fedrane deira hadde lært dei.

¹⁵ Difor seier HERREN over hærskarane, Israels Gud: Sjå, eg gjev dette folket malurt å eta og giftig vatn å drikka.

¹⁶ Eg spreier dei mellom folkeslag som korkje dei eller fedrane deira kjende. Eg sender sverdet etter dei heilt til eg har gjort ende på dei.

¹⁷ Så seier HERREN over hærskarane: Ver forstandige! Tilkall gråtekonene, send bod på dei kunnige kvinnene!

¹⁸Dei må skunda seg og koma, dei skal syngja klagesong over oss til tårer fell frå auga våre og vatn dryp frå augneloka våre.

¹⁹Høyr, det lyder klagesong frå Sion: «Å, vi er øydelagde! Vår skam er stor. No må vi bort frå landet, for dei har rive heimane våre.»

²⁰Ja, kvinner, høyr HERRENS ord, øyre, ta imot ordet frå hans munn! Lær døtrene dykkar ein klagesong og lær kvarandre ei likklage:

²¹ «Døden kom inn gjennom vindauga våre og gjekk inn i borgene våre for å utrydda småborn i gata, unge menn på torga.»

²² Tal! Slik er ordet frå HERREN: Lik av menneske skal falla som gjødsel på marka, som kornband etter haustfolket, og det er ingen til å samla dei opp.

²³Så seier HERREN: Den vise skal ikkje vera stolt av visdomen sin, den sterke skal ikkje vera stolt av styrken sin, den rike skal ikkje vera stolt av rikdomen sin.

²⁴ Men den som vil vera stolt av noko, skal vera stolt av dette: at han har forstand og kjenner meg. For eg er HERREN som viser miskunn, rett og rettferd på jorda. Ja, slik vil eg ha det, seier HERREN.

²⁵Sjå, dagar skal koma, seier HERREN, då eg vil straffa alle som er omskorne på kroppen:

²⁶[28] Egypt, Juda, Edom, ammonittane, Moab og alle som bur i ørkenen og har kortklipt hår ved tinningen. For alle folkeslaga er uomskorne, og heile Israels hus har uomskorne hjarte.