Read nynorsk 2011 Klagesongane 3 Bible Online

Klagesongane 3 - nynorsk 2011 bible

Klagesongane 3

¹Alef א [1] Eg er ein mann som har opplevd naud under staven han brukte i sinne.

²Han har ført meg og late meg gå i mørker og ikkje i lys.

³Han har vendt handa mot meg gong på gong, utan stans. Bet ב

⁴ Han har knust knoklane mine, late kjøt og hud tærast bort.

⁵Han har bygd ein mur mot meg, kringsett meg med gift og motgang.

⁶ På mørke stader lèt han meg bu lik dei som døydde for lenge sidan. Gimel ג

⁷ Han har mura meg inne, eg kjem ikkje ut, han har gjort lenkjene tunge.

⁸ Sjølv når eg skrik og ropar om hjelp, stengjer han bøna mi ute.

⁹Han har sperra vegen med steinblokker, gjort stigane mine krokete. Dalet ד

¹⁰ Ein bjørn som ligg på lur, ei løve i bakhald er han mot meg.

¹¹Han har ført meg på villspor, rive meg sund og øydelagt meg.

¹² Han har spent bogen og stilt meg opp som mål for pila. He ה

¹³Inn i nyrene har han skote sine piler.

¹⁴ Eg har vorte til latter for alt mitt folk, dei syng om meg heile dagen.

¹⁵ Med beiske urter har han metta meg, han har sløkt tørsten min med malurt. Waw ו

¹⁶Han har knust tennene mine med grus, trakka meg ned i støvet.

¹⁷ Du har teke freden frå meg, eg har gløymt kva det gode er.

¹⁸Eg sa: Mi ære har gått tapt, eg har inga von til HERREN. Zajin ז

¹⁹Tenk på mi naud og heimløyse. Dei er malurt og gift.

²⁰Eg tenkjer på det heile tida, mi sjel er nedtrykt.

²¹Men éin ting legg eg meg på hjartet, og dette gjev meg von: Het ח

²² HERREN er nådig, vi går ikkje til grunne. Hans miskunn tek ikkje slutt,

²³ ho er ny kvar morgon. Din truskap er stor.

²⁴ [5] Eg seier: HERREN er min del, eg set mi von til han. Tet ט

²⁵ HERREN er god mot dei som ventar på han og søkjer han.

²⁶Det er godt å vera stille og venta på hjelp frå HERREN.

²⁷ Det er godt for ein mann å bera åk medan han er ung. Jod י

²⁸Når det blir lagt på han, skal han sitja einsam og teia,

²⁹leggja munnen i støvet, kanskje er det von.

³⁰ Han skal snu kinnet til den som slår, og mettast med spott. Kaf כ

³¹Herren støyter ingen bort for alle tider.

³² Har han late nokon lida, skal han visa miskunn, rik på kjærleik.

³³ Det er ikkje med lett hjarte han plagar mennesket og lèt det lida. Lamed ל

³⁴Dei kan trakka på alle fangar i landet.

³⁵Dei kan krenkja retten til ein mann for auga på Den høgste.

³⁶Dei kan fordreia saka til eit menneske, men Herren har sett det. Mem מ

³⁷ Kven kan tala så det hender om ikkje Herren har bode det?

³⁸ Kjem ikkje både vondt og godt frå Den høgstes munn?

³⁹Kvifor klagar den som lever? Kvifor klagar ein mann over si synd? Nun נ

⁴⁰ Lat oss ransaka og prøva våre vegar og venda om til HERREN!

⁴¹Lat oss lyfta hjarte og hender til Gud i himmelen!

⁴² Vi har gjort opprør og vore trassige, og du tilgav ikkje. Samek ס

⁴³Du dekte deg med vreide og jaga oss, du drap, du sparte ingen.

⁴⁴ Du dekte deg med skyer, inga bøn rakk fram.

⁴⁵Du gjorde oss til skrap og skrot mellom folka. Pe פ

⁴⁶Alle fiendane våre gapar mot oss.

⁴⁷ Det vart gru og grav, krasing og knusing.

⁴⁸ Tårer strøymer frå auget, folket, mi dotter, er knust. Ajin ע

⁴⁹Auget fløymer over utan stans, det tek ikkje slutt

⁵⁰ før HERREN vender blikket og ser ned frå himmelen.

⁵¹Det gjer vondt å sjå kvinnene i byen min. Tsade צ

⁵²Utan grunn har mine fiendar jaga meg som ein fugl.

⁵³ Dei dreiv meg ned i brønnen og kasta stein over meg.

⁵⁴ Vatnet stig over hovudet mitt, eg seier: Det er ute med meg. Qof ק

⁵⁵ Eg kallar på ditt namn, HERRE, frå botnen av brønnen.

⁵⁶Du har høyrt meg, lukk ikkje øyret når eg ropar om lindring!

⁵⁷ Du kom den dagen eg ropa, du sa: Ver ikkje redd! Resj ר

⁵⁸Du har ført saka mi, Herre, du har løyst ut livet mitt.

⁵⁹Du har sett kva urett eg lid, HERRE, hjelp meg til min rett!

⁶⁰Du har sett hemnlysta deira, kva for planar dei har med meg. Sjin ש

⁶¹Du har høyrt spotten deira, HERRE, kva for planar dei har mot meg.

⁶²Uvenene mine tiskar og kviskrar om meg dagen lang.

⁶³ Sjå dei der dei sit og står, dei syng nidviser om meg. Taw ת

⁶⁴ HERRE, lat dei få som fortent for det dei har gjort.

⁶⁵Lyft di forbanning over hjartet deira som eit skjold.

⁶⁶ Jag dei i vreide og rydd dei ut under HERRENS himmel.