Read nynorsk 2011 Klagesongane 5 Bible Online

Klagesongane 5 - nynorsk 2011 bible

Klagesongane 5

¹ HERRE, tenk på det som har hendt oss, sjå hit, sjå kor dei spottar oss!

² Eigedomen vår har gått til framande, husa våre til utlendingar.

³Vi er farlause, mødrene våre har vorte enkjer.

⁴Vi må kjøpa vatnet vi drikk, veden må vi betala for.

⁵Vi har forfølgjarane på nakken, vi er trøytte og får ikkje kvila.

⁶ Vi har rett ut handa til Egypt og til Assur for å få brød.

⁷ Fedrane våre synda; dei er borte, vi har bore straffa.

⁸ [10] Slavar har vorte herrane våre, ingen riv oss ut av hendene deira.

⁹Vi hentar brød med fare for livet, i ørkenen trugar sverdet.

¹⁰Huda vår er heit som ein omn av svolten som brenn.

¹¹Dei valdtek kvinnene i Sion og jomfruene i Judas byar.

¹² Dei hengjer stormenn, ærar ikkje dei eldste.

¹³Unge menn lyt slita med kverna, gutar sig under vedbøra.

¹⁴Dei gamle sit ikkje lenger i porten, dei unge har slutta å syngja.

¹⁵Vi har ikkje lenger glede i hjartet, dansen er omsnudd til sorg.

¹⁶ Kransen har falle av hovudet. Ve oss, vi har synda!

¹⁷Hjartet har vorte sjukt, auga har vorte dimme.

¹⁸ For Sion-fjellet ligg audt, revar streifar omkring der.

¹⁹ Du, HERRE, tronar til evig tid, din kongsstol står frå slekt til slekt.

²⁰ Kvifor har du gløymt oss for alltid, gått frå oss for alle tider?

²¹ HERRE, før oss tilbake til deg, så vi kan venda attende. Gjer dagane våre nye, slik dei var før!

²²Men du har vraka oss, du er rasande.