Read nynorsk 2011 Esekiel 11 Bible Online

Esekiel 11 - nynorsk 2011 bible

Esekiel 11

¹[28] No lyfte ånda meg opp og førte meg til austporten i HERRENS hus, den som vender mot aust. Og sjå, attmed inngangen til porten var det tjuefem menn, og midt mellom dei såg eg Jaasanja, son til Assur, og Pelatja, son til Benaja, som var leiarar i folket.

²HERREN sa til meg: «Menneske! Dette er dei mennene som tenkjer ut urett og gjev dårlege råd her i byen.

³Dei seier: Å byggja hus har inga hast. Byen er gryta, og vi er kjøtet.

⁴Tal profetord mot dei! Tal profetord, menneske!»

⁵Då kom HERRENS ånd over meg og sa eg skulle seia: Så seier HERREN: Slik talar de, Israels hus, og eg kjenner dei tankane som stig opp i dykk.

⁶De har drepe så mange her i byen at gatene er fulle av falne.

⁷Difor seier Herren GUD: Dei som de drap og lét liggja i byen, det er dei som er kjøtet, og byen er gryta. Men de skal førast ut derifrå.

⁸De er redde for sverdet, og eg lèt sverdet koma mot dykk, seier Herren GUD.

⁹Eg fører dykk ut av byen, gjev dykk over til framande og fullfører dommen over dykk.

¹⁰De skal falla for sverd, ved Israels grense vil eg dømma dykk. Då skal de kjenna at eg er HERREN.

¹¹Byen skal ikkje vera ei gryte for dykk, og de skal ikkje vera kjøtet i den. Ved Israels grense vil eg dømma dykk.

¹²Då skal de kjenna at eg er HERREN, de som ikkje følgjer mine forskrifter og ikkje held mine lover, men må følgja lovene til folkeslaga omkring dykk.

¹³Medan eg profeterte, døydde Pelatja, son til Benaja. Då kasta eg meg ned med andletet mot jorda og skreik høgt: «Å, Herre GUD, gjer du ende på alt som er att av Israel?»

¹⁴ HERRENS ord kom då til meg:

¹⁵Menneske! Brørne dine, brørne dine som er saman med deg i eksil, heile Israels hus — om dei seier folket i Jerusalem: «Dei er langt borte frå HERREN. Vi har fått landet i eige.»

¹⁶Difor skal du seia: Så seier Herren GUD: Sjølv om eg førte dei langt bort mellom folkeslaga og spreidde dei i landa, vart eg ein liten heilagdom for dei i landa dei kom til.

¹⁷Difor skal du seia: Så seier Herren GUD: Eg vil samla dykk ute mellom folka, sanka dykk saman frå dei landa de er spreidde i, og gje dykk Israels land.

¹⁸Når dei kjem dit, skal dei fjerna alle dei motbydelege og avskyelege gudebileta derifrå.

¹⁹[29] Eg gjev dei eit anna hjarte, og ei ny ånd gjev eg inni dei. Eg tek steinhjartet ut or kroppen på dei og gjev dei eit kjøthjarte i staden,

²⁰slik at dei kan følgja forskriftene mine, halda fast ved lovene mine og leva etter dei. Dei skal vera mitt folk, og eg skal vera deira Gud.

²¹Men dei som i hjartet følgjer dei motbydelege og avskyelege gudane, det dei har gjort, lèt eg koma over deira eige hovud, seier Herren GUD.

²²Då lyfte kjerubane vengene sine, og hjula følgde med. Høgt oppe over dei trona herlegdomen til Israels Gud.

²³No steig HERRENS herlegdom opp frå byen og stansa på fjellet austafor.

²⁴[30] Ånda lyfte meg opp og tok meg med til dei bortførte i Kaldea. Dette hende ved Guds ånd, i eit syn. Så vart det borte for meg, det synet eg hadde hatt.

²⁵Og eg tala til dei bortførte om alt det som HERREN hadde synt meg.