Read nynorsk 2011 Esekiel 2 Bible Online

Esekiel 2 - nynorsk 2011 bible

Esekiel 2

¹[6] Han sa til meg: «Menneske! Reis deg opp, så skal eg tala med deg.»

²Då han tala til meg, kom det ånd i meg. Ho reiste meg opp på føtene, og eg kunne høyra han som tala til meg.

³Han sa til meg: «Menneske! Eg sender deg til israelittane, til opprørske folkeslag som har reist seg imot meg. Dei og fedrane deira har synda mot meg til denne dag.

⁴Til desse borna med steinandlet og harde hjarte sender eg deg, og du skal seia til dei: Så seier Herren GUD.

⁵Og anten dei vil høyra eller ikkje — for ei trassig ætt er dei — så skal dei forstå at ein profet har vore hos dei.

⁶Men du, menneske, ver ikkje redd dei, og ver ikkje redd for det dei seier, sjølv om klunger er omkring deg og du bur mellom skorpionar. Lat deg ikkje skremma av det dei seier, og mist ikkje motet, sjølv om dei er ei trassig ætt.

⁷Du skal tala mine ord til dei anten dei vil høyra eller ikkje, for trassige er dei.

⁸Men du, menneske, høyr på det eg har å seia deg! Ver ikkje trassig som denne trassige ætta. Lat opp munnen og et det eg vil gje deg.»

⁹Eg såg, og sjå! — ei hand var rett fram mot meg, og ho heldt ein bokrull.

¹⁰Han opna rullen framfor meg. Det var skrive på han, både inni og utanpå. Og det som stod skrive der, var likklage, sukk og verop.