Read nynorsk 2011 Esekiel 22 Bible Online

Esekiel 22 - nynorsk 2011 bible

Esekiel 22

¹ HERRENS ord kom til meg:

²[60] Du menneske, vil du dømma? Vil du dømma blodbyen og la han få vita om alt det avskyelege der?

³Du skal seia: Så seier Herren GUD: Byen som lèt blodet renna i gatene, hans tid kjem. Han har laga seg avgudsbilete og er vorten urein.

⁴Med blodet du lèt flyta, fører du skuld over deg, og med avgudsbileta du lagar, gjer du deg urein. Du nærmar deg dine dagars ende, du kjem til slutten av dine år. Difor gjer eg deg til spott for folkeslaga, til hån for alle land.

⁵Både nær ved og langt borte skal folk håna deg, du som har skitna til namnet ditt og er i full forvirring.

⁶Sjå, Israels fyrstar, kvar med si makt, er hos deg for å ausa ut blod.

⁷Hos deg foraktar dei far og mor, undertrykkjer innflyttarar og er harde mot farlause og enkjer.

⁸Heilagdomane mine vanvørder du, og sabbatane mine vanhelgar du.

⁹Hos deg baktalar dei og auser ut blod. Dei et offerkjøt på haugane og oppfører seg lausaktig.

¹⁰Dei avdekkjer den nakne kroppen til far sin og krenkjer kvinner som er ureine med menstruasjon.

¹¹Ein mann gjer avskyelege ting med kona til nesten sin, ein annan driv hor med svigerdottera, og ein tredje krenkjer syster si, dotter til hans eigen far.

¹²Hos deg tek dei pengar for å ausa ut blod. Du tek renter og avgift. Du utnyttar nesten din med utpressing. Men meg har du gløymt, seier Herren GUD.

¹³Sjå, eg slår hendene saman fordi du har skaffa deg urett vinning og aust ut blod.

¹⁴Held hjartet ditt enno stand, er hendene dine enno sterke den dagen eg grip inn mot deg? Eg, HERREN, har tala, og eg set det i verk.

¹⁵Eg spreier deg mellom folkeslaga og strør deg ut i landa. Og eg friar deg heilt for ureinskap.

¹⁶Du blir vanæra rett framfor auga på folkeslaga. Og då skal du kjenna at eg er HERREN.

¹⁷ HERRENS ord kom til meg:

¹⁸Menneske, for meg har Israels hus vorte til slagg. Alle er dei som kopar, tinn, jern og bly i ein smelteomn. Som ureinsa sølv er dei.

¹⁹Difor seier Herren GUD: Sjå, fordi de alle har vorte slagg, samlar eg dykk i Jerusalem.

²⁰Slik ein samlar sølv, kopar, jern, bly og tinn i ein smelteomn og så pustar på elden for å smelta det, slik skal eg i min vreide og harme samla dykk, leggja dykk i omnen og smelta dykk.

²¹Når eg samlar dykk og pustar på dykk med min vreides eld, skal de smelta i den.

²²Som sølvet smeltar i omnen, slik skal de òg smeltast i han. Då skal de kjenna at eg er HERREN, og eg auser ut min harme over dykk.

²³ HERRENS ord kom til meg:

²⁴Menneske, sei til henne: Du er eit land som ikkje er reinsa. Du får ikkje regn på vreidedagen.

²⁵Fyrstane dine liknar brølande løver som riv sund bytte. Dei et menneske, tek rikdom og dyre skattar og gjer mange til enkjer der.

²⁶Prestane gjer vald på mi lov og vanhelgar mine heilagdomar. Dei skil ikkje mellom innvigd og uinnvigd. Dei lærer ikkje folk å skilja mellom ureint og reint. Dei lèt att auga for sabbatane mine. Slik blir eg vanæra mellom dei.

²⁷Leiarane i landet liknar ulvar som riv sund byttet sitt. Dei auser ut blod og lèt liv gå tapt for å skaffa seg urett vinning.

²⁸Profetane stryk kalk på veggene for dei. Dei har tomme syn og spår løgn når dei seier: «Så seier Herren GUD», endå HERREN ikkje har sagt noko.

²⁹Folket i landet bruker vald og driv med ran og rov. Dei er harde mot hjelpelause og fattige og undertrykkjer innflyttarane utan rett.

³⁰Eg har leita mellom dei etter ein mann som kan byggja opp muren og stilla seg i mur-rivnene for landet så det ikkje blir øydelagt. Men eg fann ingen.

³¹Så auser eg ut mitt sinne over dei, eg gjer ende på dei med elden frå min vreide. Eg lèt gjerningane deira koma over deira eigne hovud, seier Herren GUD.