Read nynorsk 2011 Esekiel 26 Bible Online

Esekiel 26 - nynorsk 2011 bible

Esekiel 26

¹[69] Det var i det ellevte året, på den første dagen i månaden. HERRENS ord kom til meg:

² Menneske, Tyros har sagt om Jerusalem: «Ha-ha! Knust er ho som var ein port for folka, no er ho vend mot meg. Eg gjer meg rik, ho er lagd øyde.»

³Difor seier Herren GUD: Eg kjem over deg, Tyros. Eg lèt mange folkeslag slå inn over deg, liksom havet lèt bølgjene slå.

⁴Dei skal bryta ned murane kring Tyros og leggja tårna i grus. Eg vil feia jorda vekk og gjera henne til nake berg.

⁵ [70] Ein tørkeplass for fiskegarn skal ho bli, midt i havet, for eg har tala, seier Herren GUD. Ho skal bli eit bytte for folkeslaga.

⁶ [71] Døtrene ute på marka skal bli drepne med sverd. Dei skal kjenna at eg er HERREN.

⁷ For så seier Herren GUD: Sjå, frå nord sender eg Nebukadnesar mot Tyros, Babels konge, kongen over kongar, med hestar, vogner og ryttarar, ein hær av folk.

⁸Døtrene dine ute på marka skal han slå i hel med sverd. Han skal byggja skansar, kasta opp ein voll og reisa ein mur av skjold mot deg.

⁹Så støyter han rambukken mot murane dine, med våpen bryt han tårna ned.

¹⁰Han har så mange hestar at støvet frå dei dekkjer deg. Av larmen frå ryttarar, hjul og vogner rister murane dine når han dreg inn gjennom portane slik dei rykkjer inn i ein hærteken by.

¹¹Med hovane av sine hestar trakkar han alle gater sund. Han drep folket ditt med sverd, kraftige søyler styrtar til jorda.

¹²Dei røvar rikdomen din og tek varene til krigsbytte. Dei bryt murane ned og riv kostbare hus. Stein, tre og jord kastar dei på sjøen.

¹³ Eg gjer eg slutt på lyden av songane dine, klangen av lyrer skal ikkje høyrast.

¹⁴Eg gjer deg til eit nake berg. Ein tørkeplass for fiskegarn skal du bli. Du skal ikkje byggjast opp att, for eg, HERREN, har tala, seier Herren GUD.

¹⁵Så seier Herren GUD til Tyros: Sanneleg, kystane skal skjelva ved drønnet når du fell, når dei såra stønnar, når slaktinga set i gang hos deg.

¹⁶ [72] Då skal alle fyrstane ved havet stiga ned frå trona, leggja kappa bort og ta av seg dei fargerike kleda. Dei kler seg i redsle og set seg på jorda. Dei skjelv stadig, slegne av skrekk på grunn av deg.

¹⁷ Dei stemmer i ei likklage og seier om deg: Korleis kunne du gå til grunne, du som fekk ditt folk frå havet, den lovprisa byen som var mektig på sjøen, byen og hennar innbyggjarar som spreidde redsle blant alle som bur der.

¹⁸No skjelv kystane, det er dagen for ditt fall, øyane i havet blir slegne av skrekk over den enden du fekk.

¹⁹Så seier Herren GUD: Når eg gjer deg til ein herja by, lik byar det ikkje bur folk i, når eg lèt havdjupet slå inn over deg og veldige vatn dekkjer deg,

²⁰då fører eg deg ned til dei som har gått i grav, ned til folk frå fortida. Eg lèt deg bu i landet der nede, det liknar ruinar frå gammal tid, saman med dei som har gått i grav, så du ikkje vender attende og får plass i landet til dei levande.

²¹ Eg gjer deg til skremsel, du skal ikkje vera meir. Dei skal leita etter deg, men du skal aldri meir bli funnen, seier Herren GUD.