Read nynorsk 2011 Esekiel 27 Bible Online

Esekiel 27 - nynorsk 2011 bible

Esekiel 27

¹ HERRENS ord kom til meg:

²Du menneske, stem i ei likklage over Tyros!

³Du skal seia til Tyros, som ligg ved portane til havet og handlar med folk på mange kystar: Så seier Herren GUD: Tyros, du har sagt: «Eg er fullkomen i min venleik.»

⁴Midt ute på havet går grensene dine. Dei som bygde deg, gjorde deg fullkomen i venleik.

⁵ [73] Dei bygde med plankar av sypress frå Senir, ein seder frå Libanon tok dei for å laga deg ei mast.

⁶ Av eik frå Basan laga dei årar, treverk innlagt med elfenbein laga dei av sypress frå kittearøyane.

⁷ [74] Seglet var av fint og fargerikt lin frå Egypt. Det skulle vera merket ditt. Solduken var blått og raudt purpur frå Elisja-kystane.

⁸ [75] Folk frå Sidon og Arvad var rorskarane dine. Dine klokaste, Tyros, var mannskap.

⁹Gebals eldste og klokaste menn var skipstømrarane dine. Alle skip og sjøfolk på havet kom til deg for å byta varer.

¹⁰ [76] Menn frå Persia, Lud og Put var krigsmenn i hæren din. Dei hengde opp skjold og hjelmar hos deg, dei kasta glans over deg.

¹¹Menn frå Arvad og din eigen hær stod omkring på murane, gammadearar var i tårna dine. Dei hengde opp skjolda sine omkring på murane og gjorde deg fullkomen i venleik.

¹² [77] Tarsis dreiv handel med deg, for rikdomen din var stor. Dei gav deg sølv og jern, tinn og bly tilbake.

¹³ [78] Javan, Tubal og Mesjek handla med deg. Dei gav slavar og bronsekar i byte.

¹⁴ [79] Frå Bet-Togarma gav dei deg arbeidshestar, ridehestar og muldyr tilbake.

¹⁵Folk frå Dedan handla med deg, mange øyar dreiv handel. Dei betalte tilbake med elfenbein og ibenholt.

¹⁶Aram dreiv handel med deg fordi du hadde alle slag handverk. Edelsteinar, raudt purpur og fargerikt tøy, fint lin, korallar og rubinar gav dei deg tilbake.

¹⁷ [80] Juda og Israels land handla med deg. Kveite frå Minnit, hirse og honning, olje og balsam gav dei i byte.

¹⁸ [81] Damaskus dreiv handel med deg. Du hadde alle slag handverk, for rikdomen din var stor. Vin frå Helbon, ull frå Sahar

¹⁹ [82] og Dan og vin frå Usal gav dei deg tilbake. Også smijern, kassia og kalmus fekk du i byte.

²⁰ [83] Dedan handla med deg, fine hestedekken.

²¹Arabia og alle fyrstane i Kedar dreiv handel, dei handla med lam, bukkar og geiter.

²² [84] Kjøpmenn frå Saba og Rama handla med deg, den finaste balsam, dyre steinar og gull gav dei deg tilbake.

²³ [85] Harran, Kanne og Eden og kjøpmenn frå Saba, Assur og Kilmad handla med deg,

²⁴dei handla med deg på marknaden din, staselege klede og kapper av purpur, fargerike tøy, teppe med mønster og snorer som var tvinna stramt.

²⁵ [86] Tarsis-skip var dine handelskaravanar. Du var fylt av varer og tungt lasta midt ute på havet.

²⁶Rorskarane førte deg til mange farvatn. Austavinden knuste deg midt ute på havet.

²⁷Din rikdom, dine varer og alt du fekk i byte, mannskap og styrmenn, skipstømrarar og bytehandlarar, alle krigsmenn og heile din hær som er hos deg, søkk midt ute på havet den dagen du går under.

²⁸Når skriket frå styrmennene lyder, skjelv strendene.

²⁹Då forlèt alle sine skip, rorskarane, mannskapet og sjømennene går i land.

³⁰ Dei lèt klaga over deg lyda, dei skrik bittert. Dei kastar støv på hovudet, dei velter seg i oske.

³¹ [87] Dei rakar seg snaue på skallen for di skuld. Dei kler seg i sekkestrie og græt bittert over deg, ei bitter klage.

³²Dei stemmer i ei likklage, dei syng ut si klage over deg: Kven var som Tyros der ute på havet?

³³Med varene du førte inn frå alle hav, metta du mange folk. Med den store rikdomen din og alt du bytte til deg, gjorde du kongar på jorda rike.

³⁴No er du knust av havet, i djupet ligg du. Alt du bytte til deg og heile hæren din har gått under.

³⁵ Alle som bur ved kysten, er forstøkte over deg, håret reiser seg på hovudet til kongane, andletet er fordreia.

³⁶ Kjøpmenn mellom folka plystrar hånleg til deg. Eit skremsel har du vorte, du er borte for alltid.