Read nynorsk 2011 Esekiel 30 Bible Online

Esekiel 30 - nynorsk 2011 bible

Esekiel 30

¹ HERRENS ord kom til meg:

²Menneske, tal profetord og sei: Så seier Herren GUD: Klag og skrik: For ein dag!

³ Dagen er nær, HERRENS dag er nær, ein skytung dag. Tida er inne for folkeslaga.

⁴ Sverdet kjem over Egypt. Rier av redsle grip Kusj når egyptarar blir drepne, når rikdomane blir tekne frå dei og grunnmurane jamna med jorda.

⁵ [93] Kusj og Put, Lud og alle ørkenfolka, Kub og menn frå land dei står i pakt med, skal falla for sverd saman med dei.

⁶ [94] Så seier HERREN: Dei som støttar Egypt, skal falla. Den stolte makta deira skal gå under. Frå Migdol til Syene skal dei falla for sverd, seier Herren GUD.

⁷Dei skal leggjast aude mellom øydde land, byane skal liggja mellom ruinbyar.

⁸Dei skal kjenna at eg er HERREN når eg set eld på Egypt og alle som hjelper det, blir knuste.

⁹ Den dagen skal sendebod frå meg dra ut med skip for å skremma det trygge Kusj. Rier av redsle grip dei når dagen kjem for Egypt. For sjå, han kjem!

¹⁰Så seier Herren GUD: Eg gjer ende på rikdomane i Egypt med handa til Nebukadnesar, kongen i Babel.

¹¹ Han og folket hans med han, brutale folkeslag, skal førast dit for å herja landet. Dei skal dra sverd mot Egypt og fylla landet med falne.

¹²Eg lèt elvane tørka ut og gjev landet i hendene på vonde. Med handa til framande øydelegg eg landet og alt som fyller det. Eg, HERREN, har tala.

¹³ [95] Så seier Herren GUD: Eg lèt avgudane gå til grunne og gjer ende på fillegudane i Nof. Det skal ikkje lenger finnast nokon fyrste frå Egypt. Eg spreier redsle i landet.

¹⁴ [96] Eg legg Patros audt, set eld på Soan og held dom over No.

¹⁵ [97] Eg auser ut min harme over Sin, festningsbyen i Egypt, og øydelegg rikdomane i No.

¹⁶Eg set eld på Egypt, Sin skal vri seg i smerte, No skal stormast og Nof takast midt på lyse dagen.

¹⁷ [98] Dei unge mennene i On og Pi-Beset skal falla for sverd, og kvinnene må fara i fangenskap.

¹⁸ [99] I Tahpanhes blir dagen mørk når eg bryt herskarstavane i Egypt så den stolte makta tek slutt. Skyer skal dekkja byen, døtrene hennar må fara i fangenskap.

¹⁹Eg held dom over Egypt. Dei skal kjenna at eg er HERREN.

²⁰[100] Det var i det ellevte året, på den sjuande dagen i den første månaden. HERRENS ord kom til meg:

²¹Menneske, eg har brote armen på farao, kongen i Egypt. Sjå, ingen har forbunde han så han kan bli frisk att. Ingen har lagt han i fatle så han blir sterk nok til å gripa sverdet.

²²Difor seier Herren GUD: Sjå, eg kjem mot farao, kongen i Egypt. Eg bryt begge armane hans, både den sterke og den brotne. Eg slår sverdet ut av handa hans.

²³Eg spreier egyptarane mellom folkeslaga og strør dei ut i landa.

²⁴ Eg styrkjer armane til kongen i Babel og gjev han mitt sverd i handa, men armane til farao bryt eg. Med banesår skal han sukka og stønna framfor han.

²⁵Eg styrkjer armane til kongen i Babel, men armane til farao skal siga. Dei skal kjenna at eg er HERREN når eg legg sverdet mitt i handa på Babel-kongen og han retter det mot Egypt.

²⁶Eg spreier egyptarane mellom folkeslaga og strør dei ut i landa. Dei skal kjenna at eg er HERREN.