Read nynorsk 2011 Esekiel 35 Bible Online

Esekiel 35 - nynorsk 2011 bible

Esekiel 35

¹ HERRENS ord kom til meg:

²Menneske, vend deg mot Se'ir-fjellet og tal profetord mot det!

³Du skal seia til det: Så seier Herren GUD: Sjå, eg kjem mot deg, Se'ir-fjell, eg lyfter handa mot deg og gjer deg audt og øyde.

⁴Byane dine legg eg i røys, og sjølv skal du bli til øydemark. Då skal du kjenna at eg er HERREN.

⁵Fordi du bar på gammal fiendskap, overlét du israelittane til sverdet då ulukka ramma dei, då dei fekk si endelege straff.

⁶ Difor, så sant eg lever, seier Herren GUD, eg lèt deg blø, og blod skal forfølgja deg. Fordi du ikkje hata blod, skal blod forfølgja deg.

⁷Eg gjer Se'ir-fjellet audt og øyde, eg ryddar ut dei som ferdast der.

⁸Eg fyller Edoms fjell med drepne. På alle haugar, i dalar og bekkefar fell dei som blir drepne med sverd.

⁹Eg gjer deg til evig øydemark, byane dine skal liggja folketomme. De skal kjenna at eg er HERREN.

¹⁰[108] Du sa: «Dei to folka og dei to landa skal bli mine, vi tek dei sjølv om HERREN er der.»

¹¹Difor, så sant eg lever, seier Herren GUD: Eg skal gjera med deg slik du sjølv gjorde i din vreide og di misunning fordi du hata dei. Eg skal gje meg til kjenne mellom dei når eg dømmer deg.

¹²Du skal vita at eg, HERREN, har høyrt alle spottorda du tala mot fjella i Israel då du sa: «Øydemark! Vi har fått dei til føde.»

¹³De har vore store i munnen og nytta mange ord mot meg. Eg har høyrt det.

¹⁴Så seier Herren GUD: Til glede for heile jorda gjer eg deg til ei øydemark.

¹⁵Fordi du gledde deg då Israels eigedom vart lagd i øyde, gjer eg det same mot deg. Se'ir-fjellet og heile Edom skal bli ei øydemark. Dei skal kjenna at eg er HERREN.