Read nynorsk 2011 Esekiel 36 Bible Online

Esekiel 36 - nynorsk 2011 bible

Esekiel 36

¹Du menneske, tal profetord mot fjella i Israel og sei: Fjell i Israel, høyr HERRENS ord!

²Så seier Herren GUD: Fienden har ropa til dykk: «Ha-ha! Dei gamle haugane har vorte vår eigedom.»

³Difor skal du tala profetord og seia: Så seier Herren GUD: Dei har herja og jaga dykk frå alle kantar så de har vorte ein eigedom for andre folkeslag. De er på leppene til alle, folk kviskrar om dykk.

⁴Difor, fjell i Israel, høyr ordet frå Herren GUD! Så seier Herren GUD til fjella og haugane, til bekkefara og dalane, til røysane på dei aude tuftene og til dei folketomme byane, som har vorte plyndra og spotta av dei andre folkeslaga rundt omkring.

⁵Difor seier Herren GUD: Sanneleg, eg talar i min brennande sjalusi mot dei andre folkeslaga og mot heile Edom. Av hjartans lyst og med sjels forakt gjorde dei landet mitt til sin eigedom, til beiteland og bytte.

⁶Difor skal du tala profetord om Israels land og seia til fjella og haugane, til bekkefara og dalane: Så seier Herren GUD: Sjå, eg talar i sjalusi og harme fordi de må tola spott frå andre folk.

⁷Difor seier Herren GUD: Eg lyfter handa og sver at grannefolka dykkar sjølve skal bera sin spott.

⁸Men de, fjell i Israel, skal få greiner og bera frukt for Israel, folket mitt. For dei kjem snart!

⁹Sjå, eg vender meg til dykk. De skal bli dyrka og tilsådde.

¹⁰Eg lèt dykk få mange menneske, heile Israels hus. I byane skal det bu folk, og ruinrøysane skal byggjast opp att.

¹¹Eg lèt dykk få mange menneske og dyr. Dei skal bli mange og vera fruktbare. Eg lèt det bu folk hos dykk som i gamle dagar, og eg gjer vel imot dykk, meir enn før. De skal kjenna at eg er HERREN.

¹²Atter lèt eg menneske ferdast på dykk, mitt folk Israel skal ta deg i eige. Du skal vera deira eigedom. Og du skal aldri meir gjera dei barnlause.

¹³Så seier Herren GUD: Dei seier at du er ein menneskeetar som tek borna frå ditt eige folk.

¹⁴Men du skal ikkje eta menneske meir og ikkje gjera folket ditt barnlaust, seier Herren GUD.

¹⁵Eg lèt deg ikkje lenger høyra spottord frå folkeslaga, du skal ikkje lenger måtta tola at folk håner deg, og du skal ikkje lenger gjera folket ditt barnlaust, seier Herren GUD.

¹⁶ HERRENS ord kom til meg:

¹⁷Menneske, då israelittane budde i landet sitt, gjorde dei det ureint med si ferd og sine gjerningar. I mine auge var det som ureinskap ved menstruasjon.

¹⁸Så auste eg ut harmen min over dei fordi dei auste ut blod i landet og gjorde det ureint med avgudane sine.

¹⁹Eg spreidde dei mellom folkeslaga, dei vart strødde ut i landa. Eg dømde dei etter deira ferd og gjerningar.

²⁰Men kva folkeslag dei enn kom til, vanhelga dei mitt heilage namn. For det vart sagt om dei: «Dette er HERRENS folk, men dei måtte fara ut av landet hans.»

²¹Eg vernar mitt heilage namn, som Israels hus har vanhelga mellom folkeslaga dei kom til.

²²Difor skal du seia til Israels hus: Så seier Herren GUD: Eg grip ikkje inn for dykkar skuld, Israels hus, men for mitt heilage namn skuld, som de har vanhelga mellom dei folka de kom til.

²³Eg vil helga mitt store namn, som har vorte vanhelga mellom folkeslaga, det som de vanhelga mellom dei. Folkeslaga skal kjenna at eg er HERREN, seier Herren GUD, når eg gjennom dykk viser meg heilag for auga på dei.

²⁴Eg hentar dykk frå folkeslaga, samlar dykk frå alle landa og fører dykk heim til dykkar eige land.

²⁵Eg stenkar reint vatn på dykk, så de blir reine. Eg vil reinsa dykk for all ureinskapen og for alle avgudane.

²⁶Eg gjev dykk eit nytt hjarte, og ei ny ånd gjev eg inni dykk. Eg tek steinhjartet ut or kroppen på dykk og gjev dykk eit kjøthjarte i staden.

²⁷Og min Ande gjev eg inni dykk og gjer at de følgjer forskriftene mine, held lovene mine og lever etter dei.

²⁸Då skal de få bu i det landet eg gav fedrane dykkar. De skal vera mitt folk, og eg skal vera dykkar Gud.

²⁹Eg friar dykk ut frå all ureinskap. Så kallar eg fram kornet og gjer grøda stor; eg gjev dykk ikkje svolt.

³⁰Eg lèt trea gje mykje frukt og marka stor avling, så de ikkje meir møter forakt mellom folkeslaga fordi de svelt.

³¹Då skal de tenkja på dykkar vonde vegar, på alt de gjorde som ikkje var godt. De skal forakta dykk sjølve for syndene og det avskyelege de gjorde.

³²Det er ikkje for dykkar skuld eg grip inn, det skal de vita, seier Herren GUD. De skal kjenna spott og skam på grunn av dykkar ferd, Israels hus.

³³Så seier Herren GUD: Den dagen eg reinsar dykk for alle syndene dykkar, lèt eg dykk bu i byane, og ruinrøysane skal byggjast opp att.

³⁴Jorda som ligg aud, skal dyrkast og ikkje sjå ut som ei øydemark for alle som kjem forbi.

³⁵Då skal dei seia: Denne jorda som låg aud, har vorte som Edens hage. Og byane som låg i ruinar, i øyde og i grus, ligg der no som faste borger.

³⁶Dei folka som enno er att rundt omkring dykk, skal kjenna at eg, HERREN, har bygd opp det som låg i grus, og planta der jorda låg aud. Eg, HERREN, har tala og vil setja det i verk.

³⁷Så seier Herren GUD: Også denne bøna frå Israels hus vil eg oppfylla for dei: Eg gjer dei talrike som ein saueflokk.

³⁸Som flokken av heilage sauer, som sauene i Jerusalem på høgtidsdagane, slik skal ein flokk av menneske fylla dei byane som låg i røys. Og dei skal kjenna at eg er HERREN.