Read nynorsk 2011 Esekiel 38 Bible Online

Esekiel 38 - nynorsk 2011 bible

Esekiel 38

¹ HERRENS ord kom til meg:

²[109] Menneske, vend deg mot Gog i Magog-landet, storfyrsten over Mesjek og Tubal. Tal profetord mot han.

³Du skal seia: Så seier Herren GUD: Sjå, eg kjem imot deg, Gog, storfyrste over Mesjek og Tubal.

⁴Eg fører deg omkring, eg set krokar i kjakane dine. Så fører eg deg ut med heile din hær, med hestar og ryttarar, staseleg kledde alle i hop, ein veldig flokk med langskjold og rundskjold, alle væpna med sverd.

⁵[110] Med dei er Persia, Kusj og Put. Alle saman har skjold og hjelm.

⁶[111] Gomer med alle sine fylkingar, Togarmas hus lengst i nord med alle sine fylkingar, mange folk er med deg.

⁷Rust deg og gjer deg klar, du og heile flokken som er samla hos deg. Du skal vakta dei.

⁸Når lang tid har gått, skal du kallast ut. Når åra er omme, skal du koma til eit land som er berga frå sverdet, til eit folk som er samla frå mange folkeslag på fjella i Israel, som lenge låg aude. Dei vart henta heim frå folka, og no bur dei alle trygt.

⁹Du skal trekkja opp som eit stormvêr, du skal koma som ei sky og dekkja landet, du og alle fylkingane dine og mange folk med deg.

¹⁰Så seier Herren GUD: Den dagen kjem noko opp i hjartet ditt, og du tenkjer vonde tankar.

¹¹Du skal seia: «Mot eit land utan vern dreg eg opp, eg går mot fredelege folk som bur trygt. Alle bur dei utan murar. Bommar og portar finst ikkje.»

¹²[112] Du vil rana og røva, ta bytte og rov og venda handa mot ruinar som på nytt er busette, mot eit folk samla frå andre folkeslag, som er i ferd med å samla seg buskap og gods, der dei bur på verdsens navle.

¹³[113] Folk frå Saba og Dedan, kjøpmenn frå Tarsis og alle ungløvene der skal seia til deg: «Er det for å rana du kjem? Er det for å røva du har samla hæren din, for å føra bort sølv og gull, ta buskap og gods og rana til deg eit veldig bytte?»

¹⁴Difor skal du tala profetord, menneske, og seia til Gog: Så seier Herren GUD: Sanneleg, den dagen, når mitt folk Israel bur trygt, då skal du få vita det.

¹⁵Då skal du koma frå staden din lengst i nord, du og mange folk med deg, alle til hest, ein stor flokk og ein veldig hær.

¹⁶Du skal dra opp mot Israel, folket mitt, som ei sky for å dekkja landet. I dei siste dagar skal det skje: Eg fører deg mot landet mitt. Folkeslaga skal læra meg å kjenna når eg gjennom deg, Gog, viser meg heilag framfor auga på dei.

¹⁷[114] Så seier Herren GUD: Var det ikkje deg eg tala om i gamle dagar gjennom tenarane mine, profetane i Israel? I år etter år profeterte dei på den tida at eg skulle føra deg mot dei.

¹⁸Den dagen, dagen då Gog går mot Israels-landet, seier Herren GUD, då skal harmen stiga opp i meg.

¹⁹I min sjalusi og brennande harme seier eg: Sanneleg, den dagen skal det koma eit kraftig jordskjelv over Israels-landet.

²⁰Då skal dei skjelva for meg, fiskane i havet, fuglane under himmelen og dyra på marka, alt krypet som det kryr av på jorda, og kvart menneske som bur på jorda. Fjella skal styrta saman, berghyllene skal falla ned og alle murane falla i grus.

²¹Då kallar eg sverd over han på alle mine fjell, seier Herren GUD. Den eine skal venda sverdet mot den andre.

²²Eg straffar han med pest og blod. Høljande regn og haglsteinar, eld og svovel lèt eg regna over han og fylkingane hans og over alle folka som er med han.

²³Slik viser eg meg stor og heilag og gjev meg til kjenne for auga på mange folkeslag. Dei skal kjenna at eg er HERREN.