Read nynorsk 2011 Esekiel 39 Bible Online

Esekiel 39 - nynorsk 2011 bible

Esekiel 39

¹Du menneske, tal profetord mot Gog og sei: Så seier Herren GUD: Sjå, eg kjem mot deg, Gog, du storfyrste over Mesjek og Tubal!

²Eg snur deg rundt og driv deg av stad. Eg hentar deg frå landet lengst i nord og fører deg opp på fjella i Israel.

³Der slår eg bogen ut av venstre handa di og lèt pilene detta ut av den høgre.

⁴På fjella i Israel skal du falla, du og alle fylkingane dine og folka som er med deg. Eg gjev deg til føde for alle slags rovfuglar og for villdyr.

⁵På open mark skal du falla. For eg har tala, seier Herren GUD.

⁶Eg sender eld mot Magog og mot dei som bur trygt på kystane. Dei skal få kjenna at eg er HERREN.

⁷Eg vil gjera mitt heilage namn kjent i Israel, folket mitt, og aldri meir vil eg la mitt heilage namn bli vanæra. Då skal folkeslaga kjenna at eg, HERREN, er heilag i Israel.

⁸Sjå, det kjem, det skal henda, seier Herren GUD. Dette er dagen eg har tala om.

⁹Då skal dei som bur i Israels byar, gå ut. Dei skal setja fyr på våpna og brenna opp både rundskjold og langskjold, bogar og piler, klubber og spyd. Dei skal fyra med dei i sju år.

¹⁰Dei treng ikkje henta ved frå marka og ikkje hogga i skogane, for dei nører elden med våpna. Dei skal røva frå dei som røva dei, og plyndra dei som plyndra dei, seier Herren GUD.

¹¹Den dagen gjev eg Gog ein gravstad i Israel, i Abarim-dalen, «ferdadalen», austafor sjøen. Dalen skal stengja vegen for dei som ferdast der. Der skal dei gravleggja Gog og heile flokken hans, og dalen skal kallast Gog-flokkens dal.

¹²I sju månader skal israelittane halda på med å gravleggja dei, så landet kan bli reint.

¹³Alt folket i landet skal gravleggja dei og få ære av det den dagen eg viser min herlegdom, seier Herren GUD.

¹⁴For at landet skal bli reint, skal dei setja nokre menn til stadig å dra gjennom landet. Dei skal gravleggja dei som undervegs vart liggjande att på marka.

¹⁵Når dei fer gjennom landet og får auge på ein menneskeknokkel, skal dei setja opp eit merke der til gravarane kjem og gravlegg han i Gog-flokkens dal.

¹⁶[115] Der er det òg ein by som heiter Hamona. Slik skal dei gjera landet reint.

¹⁷Du menneske, så seier Herren GUD: Sei til fuglane, alt som har venger, og til alle ville dyr: Kom saman, ja, kom saman frå alle kantar, til det offeret eg slaktar for dykk, eit stort slaktoffer på fjella i Israel. De skal få eta kjøt og drikka blod.

¹⁸Kjøt av heltar skal de eta og drikka blod av fyrstane på jorda, som var dei vêrar og lam, bukkar og oksar, gjøfe frå Basan, alle saman.

¹⁹De skal eta feitt til de blir mette og drikka blod til de blir drukne av offeret som eg slaktar for dykk.

²⁰Ved mitt bord skal de bli mette av hestar og ryttarar, av heltar og alle slags krigarar, seier Herren GUD.

²¹Eg vil visa min herlegdom mellom folkeslaga. Alle folkeslag skal sjå min dom som eg set i verk, og mi hand som eg legg på dei.

²²Då skal Israels hus forstå at eg, HERREN, er deira Gud, frå den dagen og i all framtid.

²³Og folkeslaga skal forstå at Israels hus vart bortført på grunn av syndene sine. Fordi dei var trulause mot meg, løynde eg andletet for dei og gav dei i fiendehand, så dei alle fall for sverd.

²⁴Eg gjorde med dei etter deira ureinskap og brot; eg løynde andletet for dei.

²⁵Difor seier Herren GUD: No vil eg venda Jakobs lagnad og visa miskunn mot heile Israels hus. Eg brenn av lidenskap for mitt heilage namn.

²⁶Dei skal gløyma si vanære og all si truløyse mot meg når dei bur trygt i landet sitt og ingen skremmer dei.

²⁷Når eg fører dei heim att frå folka og samlar dei frå fiendelanda, vil eg gjennom dei visa meg heilag for auga på mange folkeslag.

²⁸Då skal dei kjenna at eg er Herren deira GUD. Eg førte dei i eksil til folkeslaga, men fører dei atter saman i deira eige land. Eg lèt ingen av dei vera att der.

²⁹Så vil eg ikkje meir løyna andletet for dei, for eg auser ut min Ande over Israels hus, seier Herren GUD.