Read nynorsk 2011 Esekiel 4 Bible Online

Esekiel 4 - nynorsk 2011 bible

Esekiel 4

¹Du menneske, ta ein teglstein og legg han framfor deg! På den skal du rissa inn ein by — Jerusalem.

²Du skal omringa byen, byggja skansar mot han og kasta opp ein voll omkring han. Lat hærar slå leir rundt byen og still opp rambukkar mot han på alle kantar!

³Ta deg ei jernplate og set henne som ein jernvegg mellom deg og byen, og vend andletet mot byen! Slik blir han omringa, og du går til åtak på han. Det skal vera eit teikn for Israels hus.

⁴Legg deg så på venstre sida og legg Israels skuld over på den. Like mange dagar som du ligg slik, skal du bera skulda til israelittane.

⁵Like mange år som dei har synda, like mange dagar lèt eg deg få, tre hundre og nitti dagar. Så lenge skal du bera Israels skuld.

⁶Når du er ferdig med desse dagane, skal du leggja deg att, no på høgre sida, og bera skulda til Juda. I førti dagar, éin dag for kvart år, lèt eg deg bera henne.

⁷Vend så andletet mot det kringsette Jerusalem! Med berr arm skal du profetera mot byen!

⁸Sjå, eg bind deg fast med tau så du ikkje kan snu deg frå side til side før du er ferdig med dei dagane du skal omringa byen.

⁹[10] Ta så kveite og bygg, bønner og linser, hirse og spelt, legg det opp i eit trau og bak brød av det! Så mange dagar som du ligg på sida, i tre hundre og nitti dagar, skal du eta av dette.

¹⁰[11] Maten du et, skal vega tjue sjekel om dagen. Dette får du å eta på eit døgn.

¹¹[12] Vatnet òg skal du drikka etter mål, ein sjettedels hin får du å drikka på eit døgn.

¹²Byggkaker skal du eta. Dei skal du steikja på menneskemøkk, rett framfor auga på folk.

¹³Og HERREN sa: Slik skal israelittane eta ureint brød mellom dei folkeslag eg driv dei bort til.

¹⁴[13] Eg svara: «Nei, min Herre og GUD, eg har aldri gjort meg urein. Frå ungdomen av og til no har eg aldri ete av sjølvdaude eller ihelrivne dyr. Og ureint offerkjøt er aldri kome inn i min munn.»

¹⁵Då sa han til meg: «Sjå, i staden for menneskemøkk lèt eg deg bruka kumøkk til å steikja brødet ditt på.»

¹⁶[14] Så sa han til meg: «Menneske, sjå, no bryt eg sund brødstaven i Jerusalem. Med uro skal dei eta brød etter vekt, og med skrekk skal dei drikka vatn etter mål.

¹⁷Når dei slepp opp for brød og vatn, skal kvar og ein bli slegen av redsle og forgå på grunn av si skuld.»