Read nynorsk 2011 Esekiel 41 Bible Online

Esekiel 41 - nynorsk 2011 bible

Esekiel 41

¹Han førte meg inn i tempelhallen og målte pilarane der. Dei var seks alner breie på kvar side.

²Døropninga var ti alner brei, og veggene på kvar side var fem alner. Han målte hallen; han var førti alner lang og tjue alner brei.

³Så gjekk han inn i det indre rommet og målte pilarane attmed døropninga til to alner. Opninga var seks alner og sideveggene sju alner breie.

⁴Han målte lengda av rommet til tjue alner og breidda mot hallen til tjue alner. Og han sa til meg: «Dette er Det høgheilage.»

⁵Han målte tempelveggen; han var seks alner tjukk. Breidda på sidebygget som låg rundt heile tempelet, var fire alner.

⁶Sideromma låg i tre høgder, det eine over det andre, i alt tretti. Dei låg inn mot tempelveggen. I tempelveggen var det framspring som feste for sideromma omkring. Ikkje noko feste gjekk inn i sjølve tempelveggen.

⁷Ein brei gang gjekk rundt og opp til sideromma. For gangen steig omkring tempelbygningen. Difor vart bygningen brei i høgda. Slik kom ein nedanfrå og heilt opp gjennom den mellomste høgda.

⁸Eg såg at grunnen var bygd noko høgare rundt tempelet til fundament for sideromma. Han målte ei heil målestong, seks alner, ut til kanten.

⁹Ytterveggen i sideromma var fem alner tjukk. Mellom sideromma ved tempelet

¹⁰og dei andre romma var det ein open plass, tjue alner brei. Han gjekk rundt heile tempelet.

¹¹Sideromma hadde dører ut mot den opne plassen, ei dør mot nord og ei mot sør. Muren omkring plassen var fem alner tjukk.

¹²Bygningen som vende mot den inngjerda plassen på vestsida, var sytti alner brei. Veggen i bygningen var fem alner tjukk heilt rundt og nitti alner lang.

¹³Han målte tempelet. Det var hundre alner langt. Den inngjerda plassen med bygning og vegger var òg hundre alner lang.

¹⁴Framsida på tempelet og den inngjerda plassen mot aust var i alt hundre alner brei.

¹⁵Så målte han lengda av bygningen ut mot den inngjerda plassen på baksida. Med avsatsane på begge sider var det i alt hundre alner. Den indre tempelhallen og forhallen ut mot føregarden

¹⁶hadde tak. Langs dei bordkledde gangane over fundamentet var det tronge vindauge i dei tre høgdene. Veggene var bordkledde frå bakken opp til vindauga

¹⁷og over døropninga. Både i og utanfor tempelet, overalt på veggene inne og ute, var det felt med

¹⁸bilete av kjerubar og palmar, éin palme mellom to kjerubar. Kvar kjerub hadde to andlet.

¹⁹Eit menneskeandlet var vendt mot palmen frå den eine sida og eit løveandlet frå den andre. Slike bilete var det overalt i tempelet.

²⁰Frå bakken til opp over døra var det bilete av kjerubar og palmar på veggene i tempelhallen.

²¹Tempelhallen hadde firkanta dørstolpar. Framfor det heilage rommet var det noko som kunne sjå ut som

²²[123] eit altar av tre, tre alner høgt og to alner langt. Det hadde hjørne, sokkel og vegger av tre. Han sa til meg: «Dette er det bordet som står framfor HERRENS andlet.»

²³Tempelhallen hadde to dører, og det heilage rommet

²⁴hadde to dører. Dei hadde to svingbare blad, to blad på kvar dør.

²⁵På dørblada til tempelhallen var det bilete av kjerubar og palmar, slik som på veggene. På utsida av forhallen var det ein himling av tre.

²⁶Det var tronge vindauge og palmeornament på begge sider i forhallen, i sideromma rundt tempelet og på himlingane.