Read nynorsk 2011 Hosea 10 Bible Online

Hosea 10 - nynorsk 2011 bible

Hosea 10

¹ [37] Israel var ein frodig vinstokk som bar mykje frukt. Jo meir frukt, dess fleire altar. Jo betre land, dess betre steinstøtter.

²Sleipt er hjartet deira, no må dei ta på seg skulda. Han skal bryta ned altara deira og slå sund steinstøttene.

³No må dei seia: «Vi har ingen konge, for vi har ikkje frykta HERREN. Og kongen, kva kan han gjera for oss?»

⁴ Dei har tala tomme ord, svore falskt og gjort pakter. Retten blømer som giftplanter i plogfòrene.

⁵ [38] Dei som bur i Samaria, er redde kalven i Bet-Aven. Folket hans sørgjer over han, og avgudsprestane klagar, for hans herlegdom er bortført.

⁶ Han skal òg førast til Assur som gåve til storkongen. Skam skal Efraim få, Israel skal bli til skamme på grunn av planane sine.

⁷Samaria skal gå til grunne, kongen skal bli som ein kvist på vatnet.

⁸ Avens offerhaugar skal utslettast, Israels synd. Torn og tistel skal veksa opp over altara deira. Dei skal seia til fjella: Løyn oss! og til haugane: Fall over oss!

⁹ [39] Frå Gibeas dagar har du synda, Israel. Der har dei vorte ståande. Skulle ikkje krigen nå dei i Gibea? Eg vil koma over ugjerningsmennene

¹⁰for å tukta dei. Folkeslag skal samla seg mot dei når dei blir tukta for si doble skuld.

¹¹Efraim var ei tamd kvige som gjerne ville treskja, og eg sparte den vakre nakken hennar. No vil eg spenna Efraim for, Juda skal pløya og Jakob harva.

¹² Så med rettferd, haust med kjærleik, bryt dykk nybrot! For no er det tid for å søkja HERREN, inntil han kjem og lèt rettferd regna over dykk.

¹³ De har pløgd ned urett og hausta vondskap og ete frukta av løgn. For du stola på din eigen veg og på alle krigarane dine.

¹⁴ [40] Difor skal krigslarm reisa seg i folket ditt, og alle borgene dine skal øydeleggjast, slik Sjalman øydela Bet-Arbel på stridens dag, då mor og born vart knuste.

¹⁵ Slik vil eg gjera med dykk i Betel fordi vondskapen dykkar er stor. Når dagen gryr, er det ute med Israels konge.