Read nynorsk 2011 Hosea 5 Bible Online

Hosea 5 - nynorsk 2011 bible

Hosea 5

¹ [22] Høyr dette, de prestar, og lytt, du Israels hus, du kongehus, vend øyret til! Dommen gjeld dykk! For de har vorte ei snare for Mispa, eit utspent nett på Tabor

² [23] og ei djup fallgrav i Sjittim. Men eg vil tukta dei alle.

³ Eg kjenner Efraim, og Israel er ikkje løynt for meg. For no har du drive hor, Efraim, Israel har gjort seg urein.

⁴ Gjerningane deira hindrar dei frå å venda om til sin Gud. For dei har ei horeånd i seg, og HERREN kjenner dei ikkje.

⁵ Israels hovmod vitnar mot han. Israel og Efraim skal snubla i si skuld. Juda òg skal snubla med dei.

⁶ Når dei kjem med sitt småfe og storfe for å søkja HERREN, finn dei han ikkje. Han har vendt seg bort frå dei.

⁷ [24] Dei har vore trulause mot HERREN, for dei har fått born som ikkje er hans. No skal nymånen eta opp både dei og det dei eig.

⁸ [25] Lat hornet gjalla i Gibea, blås i trompet i Rama, lyft hærrop i Bet-Aven! Dei er etter deg, Benjamin!

⁹ Efraim skal leggjast øyde den dagen straffa kjem, mellom Israels stammar har eg kunngjort det som står fast.

¹⁰ Judas stormenn liknar slike som flytter grensesteinar, over dei vil eg ausa ut harmen min som vatn.

¹¹ Efraim er undertrykt, retten er knust, for han gav seg til å følgja det som ingenting er.

¹²Eg er som møll for Efraim, som ròte for Judas hus.

¹³ [26] Og Efraim såg sin sjukdom og Juda sitt sår. Då gjekk Efraim til Assur og sende bod til storkongen. Men han kan ikkje gjera dykk friske og ikkje lækja dykkar sår.

¹⁴Sanneleg, eg er som ei løve mot Efraim, som ei ungløve mot Judas hus. Eg, eg riv sund og går min veg, eg sleper bort, og ingen bergar.

¹⁵ Eg vil venda attende til min stad til dess dei erkjenner si skuld og søkjer mitt andlet. I si naud skal dei leita etter meg.