Read nynorsk 2011 Joel 1 Bible Online

Joel 1 - nynorsk 2011 bible

Joel 1

¹ HERRENS ord som kom til Joel, son til Petuel.

²Høyr dette, de eldste, og lytt, alle som bur i landet! Har slikt hendt før i dykkar dagar eller i dagane til fedrane dykkar?

³Dette skal de fortelja til borna dykkar og dei til borna sine og deira born til ei slekt som kjem.

⁴ [1] Det som var att etter den tyggjande grashoppa, åt den svermande, det som var att etter den svermande, åt den hoppande, det som var att etter den hoppande, åt den gnagande grashoppa opp.

⁵Vakna, de drukne, og gråt! Klag, alle de som drikk vin, over druesaft munnen ikkje fekk smaka.

⁶For eit folk har drege opp mot landet mitt, mektig og utan tal. Tenner har dei som ei løve og kjevar som ei løvinne.

⁷Dei øydela vinstokkane mine og knekte fikentrea, flekte av, slengde bort, greinene vart kvite.

⁸Klag som ei sørgjekledd jomfru klagar over sin ungdoms brudgom!

⁹ Grødeoffer og drikkoffer finst ikkje lenger i HERRENS hus, prestane, HERRENS tenarar, sørgjer.

¹⁰ Åkeren er øydelagd, jorda sørgjer, for kornet er øydelagt, vinen tørka inn, oljen er borte.

¹¹ Bøndene blir til skamme, og vindyrkarane klagar over kveite og bygg, for grøda på åkeren er tapt.

¹² Vinstokken er tørka inn, fikentreet visna, granateple, palme og apal, kvart tre på marka er tørt. Mellom menneska er gleda tørka inn.

¹³ [2] Kled dykk til klage, prestar! Skrik, de som tener ved altaret! Gå inn og vak i sekkestrie, de som tener min Gud. For grødeoffer og drikkoffer blir haldne borte frå dykkar Guds hus.

¹⁴ Rop ut ei heilag faste, kunngjer ei høgtidssamling! Kall saman dei eldste, alle som bur i landet, i HERREN dykkar Guds hus og rop til HERREN!

¹⁵ Å, for ein dag! Ja, nær er HERRENS dag, han kjem med vald frå Den veldige.

¹⁶Vart ikkje maten borte for auga våre, glede og jubel frå vår Guds hus?

¹⁷Såkornet har tørka under jordskorpa, bingane er tomme, låvane rivne, for kornet er tørka inn.

¹⁸ Kor buskapen rautar! Bølingar streifar omkring, for dei har ikkje beite. Sjølv saueflokkane må lida.

¹⁹Til deg, HERRE, ropar eg. For elden har ete opp beita i øydemarka, flammar har svidd av kvart tre på marka.

²⁰Sjølv villdyra skrik til deg, for bekkefara er tørka ut og elden har ete opp beita i øydemarka.