Read nynorsk 2011 Amos 2 Bible Online

Amos 2 - nynorsk 2011 bible

Amos 2

¹ Så seier HERREN: Tre ugjerningar av Moab, ja, fire — eg held det ikkje tilbake! For dei brende Edom-kongens knoklar til kalk.

² [6] Eg sender eld mot Moab, han skal øyda borgene i Kerijot. Moab skal døy under krigslarm, under kamprop og hornstøytar.

³Eg ryddar ut dommaren der og drep stormennene med, seier HERREN.

⁴ Så seier HERREN: Tre ugjerningar av Juda, ja, fire — eg held det ikkje tilbake! For dei forakta HERRENS lov, dei heldt ikkje hans forskrifter. Løgner førte dei vill, løgner som fedrane følgde.

⁵Eg sender eld mot Juda, han skal øyda borgene i Jerusalem.

⁶ Så seier HERREN: Tre ugjerningar av Israel, ja, fire — eg held det ikkje tilbake! For dei sel den rettferdige for pengar, den fattige for eit par sandalar.

⁷Dei trakkar hovudet til dei svake ned i støvet og trengjer hjelpelause bort frå vegen. Ein mann og far hans går til same jenta så mitt heilage namn blir vanhelga.

⁸ Dei breier seg på pantsette klede attmed kvart altar. Vin teken i bøter drikk dei i huset til sin Gud.

⁹ Men det var eg som rydda ut amorittane for dei, dei som var høge som sedrar og sterke som eiker. Eg øydela frukta oppe og røtene nede.

¹⁰Det var eg som førte dykk opp frå Egypt og leidde dykk i øydemarka i førti år så de kunne ta amorittlandet.

¹¹ [7] Eg lét nokre av sønene dykkar stå fram som profetar og nokre unge menn som nasirearar. Er det ikkje slik, israelittar? seier HERREN.

¹² Men de skjenkte nasirearane vin og baud profetane: Tal ikkje profetord!

¹³Sjå, eg lèt grunnen skaka under dykk som under ei vogn full av korn.

¹⁴Den raske er ikkje i stand til å flykta, den sterke kan ikkje bruka si kraft, og helten bergar ikkje livet.

¹⁵Bogeskyttaren held ikkje stand, den som er lett på foten, kjem seg ikkje unna, og ryttaren bergar ikkje livet.

¹⁶Den djervaste helten skal rømma naken den dagen, seier HERREN.