Read nynorsk 2011 Amos 5 Bible Online

Amos 5 - nynorsk 2011 bible

Amos 5

¹ [14] Høyr dette ordet, Israels hus, ei likklage som eg stemmer i om dykk.

² [15] Ho er fallen, ho reiser seg aldri meir, jomfru Israel. Ho ligg forlaten på eiga jord, ingen reiser henne opp.

³For så seier Herren GUD: Den byen som dreg ut med tusen mann, får hundre att, og den som dreg ut med hundre, får ti att i Israels hus.

⁴ For så seier HERREN til Israels hus: Søk meg, så skal de leva!

⁵ Søk ikkje til Betel, gå ikkje til Gilgal, far ikkje til Beer-Sjeba. For Gilgal skal drivast i eksil, og Betel skal bli til inkjes.

⁶ [16] Søk HERREN, så skal de leva! Elles kjem han som eld over Josefs hus, han øyder, og det er ingen i Betel til å sløkkja.

⁷ Dei gjer retten til malurt og kastar rettferda til jorda.

⁸ Han som skapte Sjustjerna og Orion, han som gjer dødsskugge om til morgon og dagen til svarte natt, han som kallar på vatnet i havet og auser det ut over jorda, HERREN er namnet hans.

⁹Han som lèt øyding lyna over borga; øyding kjem over festninga.

¹⁰ [17] Dei hatar den som hevdar retten i porten, og avskyr den som talar sant.

¹¹ De trakkar småkårsfolk ned og krev korn i avgift av dei. Difor: De har bygd hus av hoggen stein, men skal ikkje få bu i dei. De har planta herlege vinmarker, men får ikkje drikka vinen.

¹² For eg kjenner til dykkar mange brot og dei tallause syndene dykkar, de som forfølgjer rettferdige, tek stikkpengar og driv fattige vekk frå porten.

¹³Difor teier den kloke i denne tida, for det er ei vond tid.

¹⁴ Søk det gode og ikkje det vonde, så de får leva! Då skal HERREN, allhærs Gud, vera med dykk, som de seier.

¹⁵ [18] Hat det vonde og elsk det gode, hald retten høgt i porten! Så vil kanskje HERREN, allhærs Gud, vera nådig mot resten av Josef.

¹⁶ Difor, så seier HERREN, allhærs Gud, Herren: På alle torg skal det vera klage, i alle gater skal dei ropa: «Ve, ve!» Dei skal kalla på bonden til sorg og på folk som kan gråta, til klage.

¹⁷På alle vinmarker blir det klage når eg går fram mellom dykk, seier HERREN.

¹⁸ Ve dykk som lengtar etter HERRENS dag! Kva vil de med Herrens dag? Han er mørker og ikkje lys.

¹⁹ Han er lik ein mann som rømmer frå løva og møter bjørnen. Og når han kjem heim og støttar handa til veggen, bit ormen han.

²⁰ Ja, mørk er HERRENS dag og ikkje lys, dyster og utan lysskin.

²¹ Eg foraktar, ja, hatar festane dykkar, høgtidssamlingane held eg ikkje ut.

²² For om de ber fram brennoffer eller grødeoffer, vil eg ikkje ha dei. Og fredsoffera dykkar med gjøkalvkjøt vil eg ikkje sjå.

²³Fri meg frå dei ståkande songane dine, eg vil ikkje høyra på harpespel!

²⁴Lat rett vella fram som vatn og rettferd lik bekker som alltid strøymer.

²⁵ Bar de fram for meg slaktoffer og grødeoffer dei førti åra i ørkenen, Israels hus?

²⁶ [19] Og bar de på Sakkut, kongen dykkar, og Kevan, gudestjerna, bileta som de har laga?

²⁷ [20] Eg fører dykk i eksil bortanfor Damaskus, seier HERREN. Allhærs Gud er namnet hans.