Read nynorsk 2011 Jona 1 Bible Online

Jona 1 - nynorsk 2011 bible

Jona 1

¹HERRENS ord kom til Jona, son til Amittai:

²«Stå opp, gå til storbyen Ninive og rop ut over byen at vondskapen deira har stige opp for mitt andlet.»

³[1] Då stod Jona opp for å rømma til Tarsis, bort frå HERREN. Han drog ned til Jaffa og fann eit skip som skulle til Tarsis. Så betalte han for ferda og gjekk ned i båten. Han ville vera med til Tarsis, bort frå HERREN.

⁴Men HERREN kasta ein mektig vind ned over havet, og stormen vart så hard at skipet heldt på å bli knust.

⁵Sjøfolka vart redde, og kvar mann ropa til sin gud. Lasta som var om bord, kasta dei på sjøen så skipet skulle letna. Men Jona hadde gått ned under dekk og lagt seg og låg i djup søvn.

⁶Kapteinen kom bort til han og sa: «Kva er det med deg? Søv du? Stå opp og rop til guden din! Kanskje guden vil hugsa på oss så vi ikkje går under.»

⁷Mennene sa til kvarandre: «Lat oss kasta lodd, så vi kan få vita kven som er skuld i at denne ulukka har ramma oss!» Dei kasta lodd, og loddet fall på Jona.

⁸Då sa dei til han: «Sei oss no kven som er skuld i at denne ulukka har ramma oss! Kva slags arbeid har du? Kvar kjem du frå? Kva for eit land er du frå? Og kva for eit folk høyrer du til?»

⁹Han svara: «Eg er hebrear og fryktar HERREN, Gud i himmelen, som har skapt havet og det tørre landet.»

¹⁰Då vart sjømennene gripne av stor redsle. Dei sa til han: «Kva er det du har gjort!» For dei visste at han hadde rømt bort frå HERREN. Det hadde han fortalt dei.

¹¹«Kva skal vi gjera med deg», sa dei, «så havet kan falla til ro omkring oss?» For stormen på havet vart sterkare og sterkare.

¹²Han svara: «Lyft meg opp og kast meg i havet, så skal det halda opp med å rasa! For eg veit at det er mi skuld at den sterke stormen har råka dykk.»

¹³Mennene rodde på for å koma til lands att, men dei greidde det ikkje. For det storma sterkare og sterkare imot dei på havet.

¹⁴Då ropa dei til HERREN: «HERRE! Lat ikkje oss gå under fordi denne mannen mistar livet. Lat ikkje skuldlaust blod koma over oss. For du, HERRE, har gjort som du ville.»

¹⁵Så lyfte dei Jona opp og kasta han på sjøen. Då heldt havet opp å rasa og vart stilt.

¹⁶Mennene vart gripne av stor frykt for HERREN. Dei ofra slaktoffer til HERREN og gav lovnader.