Read nynorsk 2011 4. Mosebok 1 Bible Online

4. Mosebok 1 - nynorsk 2011 bible

4. Mosebok 1

¹ HERREN tala til Moses i teltheilagdomen i Sinai-ørkenen. Det var på den første dagen i den andre månaden i det andre året etter at dei drog ut frå Egypt. Han sa:

²Tel opp heile Israels forsamling, slekt for slekt og familie for familie, og skriv opp namna på alle menn, hovud for hovud.

³Du og Aron skal mønstra alle stridsføre i Israel som er tjue år eller meir, hæravdeling for hæravdeling.

⁴Ta med dykk éin mann for kvar stamme, han som er leiar for familiane.

⁵Dette er namna på dei mennene som skal stå saman med dykk: Frå Ruben: Elisur, son til Sjede'ur;

⁶frå Simon: Sjelumiel, son til Surisjaddai;

⁷frå Juda: Nahsjon, son til Amminadab;

⁸frå Jissakar: Netanel, son til Suar;

⁹frå Sebulon: Eliab, son til Helon;

¹⁰frå Josef-sønene, frå Efraim: Elisjama, son til Ammihud, og frå Manasse: Gamliel, son til Pedasur;

¹¹frå Benjamin: Abidan, son til Gidoni;

¹²frå Dan: Ahieser, son til Ammisjaddai;

¹³frå Asjer: Pagiel, son til Okran;

¹⁴frå Gad: Eljasaf, son til De'uel;

¹⁵frå Naftali: Ahira, son til Enan.

¹⁶[1] Dette er dei utvalde frå forsamlinga, leiarane for fedrestammane deira, overhovuda for Israels tusen.

¹⁷Moses og Aron tok med seg desse mennene som var nemnde med namn.

¹⁸Så kalla dei heile forsamlinga saman, den første dagen i den andre månaden. Alle som var tjue år eller meir, vart innførte i namnelister etter slekter og familiar, hovud for hovud.

¹⁹Moses mønstra folket i Sinai-ørkenen, slik HERREN hadde pålagt han.

²⁰Etterkomarane av Ruben, Israels førstefødde, vart innførte i listene, slekt for slekt og familie for familie. Alle stridsføre som var tjue år eller meir, vart innskrivne, hovud for hovud.

²¹46 500 vart mønstra i Ruben-stammen.

²²Etterkomarane av Simon vart innførte i listene, slekt for slekt og familie for familie. Alle stridsføre som var tjue år eller meir, vart mønstra, hovud for hovud.

²³59 300 vart mønstra i Simon-stammen.

²⁴Etterkomarane av Gad vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

²⁵45 650 vart mønstra i Gad-stammen.

²⁶Etterkomarane av Juda vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

²⁷74 600 vart mønstra i Juda-stammen.

²⁸Etterkomarane av Jissakar vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

²⁹54 400 vart mønstra i Jissakar-stammen.

³⁰Etterkomarane av Sebulon vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

³¹57 400 vart mønstra i Sebulon-stammen.

³²Etterkomarane av Efraim, son til Josef, vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

³³40 500 vart mønstra i Efraim-stammen.

³⁴Etterkomarane av Manasse vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

³⁵32 200 vart mønstra i Manasse-stammen.

³⁶Etterkomarane av Benjamin vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

³⁷35 400 vart mønstra i Benjamin-stammen.

³⁸Etterkomarane av Dan vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

³⁹62 700 vart mønstra i Dan-stammen.

⁴⁰Etterkomarane av Asjer vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

⁴¹41 500 vart mønstra i Asjer-stammen.

⁴²Etterkomarane av Naftali vart innførte i listene, slekt for slekt og familie for familie. Alle stridsføre som var tjue år eller meir, vart innskrivne.

⁴³53 400 vart mønstra i Naftali-stammen.

⁴⁴Dette er dei som vart mønstra av Moses og Aron og leiarane for Israel. Leiarane var tolv mann, éin for kvar slekt.

⁴⁵Israelittane vart mønstra, familie for familie, alle stridsføre i Israel som var tjue år eller meir.

⁴⁶I alt var det 603 550 som vart mønstra.

⁴⁷Men levittane vart ikkje mønstra etter fedrestammen sin saman med dei andre.

⁴⁸For HERREN hadde sagt til Moses:

⁴⁹Berre Levi-stammen skal du ikkje mønstra. Dei skal du ikkje telja saman med dei andre israelittane!

⁵⁰[2] Men du skal setja levittane til å ha tilsyn med bustaden for vitnemålet, med alle tinga der og alt som høyrer til. Dei skal bera bustaden og alle tinga som er i han, og gjera teneste i bustaden, og dei skal slå leir kring han.

⁵¹[3] Når bustaden skal flyttast, skal levittane ta han ned. Og når han skal reisast, skal levittane setja han opp. Om ein framand kjem nær han, skal han døy.

⁵²Israelittane skal slå leir, hæravdeling for hæravdeling, kvar mann i sin leir og under sitt banner.

⁵³Men levittane skal slå leir kring vitnemålsbustaden, så ikkje vreide skal koma over Israels forsamling. Levittane skal ha tilsyn med vitnemålsbustaden.

⁵⁴Dette gjorde israelittane. Alt HERREN hadde gjeve Moses påbod om, gjorde dei.