Read nynorsk 2011 4. Mosebok 10 Bible Online

4. Mosebok 10 - nynorsk 2011 bible

4. Mosebok 10

¹ HERREN sa til Moses:

²Lag deg to trompetar! Du skal laga dei av hamra sølv. Du skal bruka dei når du kallar forsamlinga saman, og når leiren skal brytast.

³Når dei blæs i dei, skal heile forsamlinga koma saman hos deg ved opninga til teltheilagdomen.

⁴Blæs dei berre i den eine, skal leiarane, overhovuda for Israels tusen, samlast hos deg.

⁵Når de blæs lange støytar, skal dei som har leir mot aust, bryta opp.

⁶Når de blæs lange støytar andre gongen, skal dei som har leir mot sør, bryta opp. Lange støytar skal blåsast når dei skal bryta opp.

⁷Når de kallar forsamlinga saman, skal de gje signal, men ikkje blåsa lange støytar.

⁸Det er Aron-sønene, prestane, som skal blåsa i trompetane. Dette skal vera ei evig ordning for dykk, frå slekt til slekt.

⁹Når de dreg i krig i dykkar eige land mot ein fiende som går til åtak på dykk, skal de blåsa lange støytar på trompetane. Då skal HERREN dykkar Gud minnast dykk, så de blir berga frå fiendane.

¹⁰[20] På glededagane og i høgtidene og på nymånedagane dykkar skal de blåsa i trompetane når de ber fram brennoffer og fredsoffer. Det skal vera ei påminning om dykk hos dykkar Gud. Eg er HERREN dykkar Gud.

¹¹I det andre året, på den tjuande dagen i den andre månaden, lyfte skya seg frå vitnemålsbustaden.

¹²[21] Då braut israelittane opp frå Sinai-ørkenen og drog fram i dagsmarsjar. Og skya stansa i Paran-ørkenen.

¹³Dette var første gongen dei braut opp på HERRENS ord gjennom Moses.

¹⁴Leiren til Juda-sønene braut først opp under sitt banner, hæravdeling for hæravdeling. Hærføraren var Nahsjon, son til Amminadab.

¹⁵Hærføraren for Jissakar-stammen var Netanel, son til Suar.

¹⁶Hærføraren for Sebulon-stammen var Eliab, son til Helon.

¹⁷Så vart bustaden teken ned, og dei som skulle bera han, Gersjon-sønene og Merari-sønene, braut opp.

¹⁸Så braut Ruben-leiren opp under sitt banner, hæravdeling for hæravdeling. Hærførar var Elisur, son til Sjede'ur.

¹⁹Hærførar for Simon-stammen var Sjelumiel, son til Surisjaddai.

²⁰Hærførar for Gad-stammen var Eljasaf, son til De'uel.

²¹Så braut kehatittane opp, dei som bar dei heilage tinga. Før dei kom fram, skulle bustaden reisast.

²²Så braut leiren til Efraim-sønene opp under sitt banner, hæravdeling for hæravdeling. Hærføraren var Elisjama, son til Ammihud.

²³Hærførar for Manasse-stammen var Gamliel, son til Pedasur.

²⁴Hærførar for Benjamin-stammen var Abidan, son til Gidoni.

²⁵Så braut leiren til Dan-sønene opp under sitt banner, som baktropp for alle leirane, hæravdeling for hæravdeling. Hærføraren var Ahieser, son til Ammisjaddai.

²⁶Hærførar for Asjer-stammen var Pagiel, son til Okran.

²⁷Hærførar for Naftali-stammen var Ahira, son til Enan.

²⁸Slik var avmarsjen då israelittane drog av stad, hæravdeling for hæravdeling.

²⁹Moses sa til svogeren sin, Hobab, son til Re'uel frå Midjan: «No bryt vi opp og dreg til den staden som HERREN sa han ville gje oss. Kom med oss, så skal vi sørgja godt for deg. For HERREN har lova det gode for Israel.»

³⁰Hobab svara: «Eg blir ikkje med, eg går heller heim til mitt eige land og mi eiga slekt.»

³¹Då sa Moses: «Gå ikkje frå oss! Du veit best kvar vi skal slå leir i ørkenen. Du må vera auge for oss.

³²Går du med oss, skal vi la alt det gode som HERREN gjer mot oss, òg koma deg til gode.»

³³[22] Så braut dei opp og drog frå HERRENS fjell, tre dagsreiser. Og HERRENS paktkiste drog føre dei, tre dagsreiser, for å finna ein kvilestad for dei.

³⁴HERRENS sky var over dei om dagen når dei braut opp frå leiren.

³⁵Kvar gong kista braut opp, sa Moses: «Reis deg, HERRE! Lat fiendane dine bli spreidde og motstandarane dine flykta for deg!»

³⁶Og når ho var i ro, sa han: «Kom tilbake, HERRE, til Israels ti tusen gonger tusen!»