Read nynorsk 2011 4. Mosebok 12 Bible Online

4. Mosebok 12 - nynorsk 2011 bible

4. Mosebok 12

¹Ein gong tok Mirjam og Aron til orde mot Moses på grunn av den kusjittiske kona hans; for han hadde teke seg ei kone frå Kusj.

²Dei sa: «Er det berre Moses HERREN har tala med? Har han ikkje tala med oss òg?» Dette høyrde HERREN.

³Men Moses var ein svært audmjuk mann, meir audmjuk enn noko anna menneske på jorda.

⁴Brått sa HERREN til Moses og til Aron og Mirjam: «Gå ut til teltheilagdomen, alle tre!» Alle tre gjekk ut.

⁵Då steig HERREN ned i ei skysøyle og stilte seg i opninga til teltet. Han kalla på Aron og Mirjam, og begge kom fram.

⁶Så sa HERREN: Høyr mine ord! Er det ein profet hos dykk? I syn gjev eg meg til kjenne for han, i draumar talar eg til han.

⁷ Slik er det ikkje med Moses, tenaren min. I heile mitt hus er han den mest trudde.

⁸ Andlet til andlet talar eg med han, i klåre syn, ikkje i gåter, HERRENS skapnad ser han. Kvifor var de ikkje redde for å ta til orde mot Moses, tenaren min?

⁹ HERRENS vreide flamma opp mot dei, og han gjekk bort.

¹⁰Då skya drog seg bort frå teltet, sjå, då hadde Mirjam fått ein hudsjukdom, og huda hennar var som snø. Med det same Aron snudde seg mot Mirjam, såg han at ho var sjuk.

¹¹Han sa til Moses: «Herre, straff oss ikkje for ei synd vi har gjort i vår dårskap.

¹²Lat ikkje Mirjam vera lik eit dødt foster som er halvt borttært når det kjem ut or mors liv!»

¹³Då ropa Moses til HERREN: «Gud, gjer henne frisk!»

¹⁴Men HERREN svara Moses: «Om far hennar hadde spytta henne i andletet, måtte ho ikkje då sitja med skam i sju dagar? Ho skal stengjast ute frå leiren i sju dagar. Sidan kan ho koma inn att.»

¹⁵Så stengde dei Mirjam ute frå leiren i sju dagar, og folket braut ikkje opp før ho var komen inn att.

¹⁶Men då drog dei vidare frå Haserot og slo leir i Paran-ørkenen.