Read nynorsk 2011 4. Mosebok 13 Bible Online

4. Mosebok 13 - nynorsk 2011 bible

4. Mosebok 13

¹ HERREN sa til Moses:

²«Send av stad nokre menn for å utforska Kanaan-landet, som eg vil gje israelittane. Éin mann for kvar fedreætt skal de senda, og alle skal vera leiarar.»

³På HERRENS ord sende Moses dei ut frå Paran-ørkenen. Kvar mann var mellom overhovuda for israelittane.

⁴Dette er namna deira: for Ruben-stammen Sjammua, son til Sakkur;

⁵for Simon-stammen Sjafat, son til Hori;

⁶for Juda-stammen Kaleb, son til Jefunne;

⁷for Jissakar-stammen Jigal, son til Josef;

⁸for Efraim-stammen Hosea, son til Nun;

⁹for Benjamin-stammen Palti, son til Rafu;

¹⁰for Sebulon-stammen Gaddiel, son til Sodi;

¹¹for Josef-stammen, det vil seia Manasse-stammen, Gaddi, son til Susi;

¹²for Dan-stammen Ammiel, son til Gemalli;

¹³for Asjer-stammen Setur, son til Mikael;

¹⁴for Naftali-stammen Nahbi, son til Vofsi;

¹⁵for Gad-stammen Ge'uel, son til Maki.

¹⁶Det var namna på dei mennene som Moses sende for å utforska landet. Men han gav Hosea, son til Nun, namnet Josva.

¹⁷Då Moses sende dei av stad for å utforska Kanaan-landet, sa han til dei: «Dra opp til Negev og vidare opp i fjellet!

¹⁸Sjå korleis landet er, og om folket som bur der, er sterkt eller veikt, lite eller stort.

¹⁹Korleis er landet dei bur i, er det godt eller dårleg? Kva slag byar held dei til i, er det teltleirar eller festningsbyar?

²⁰Og korleis er jorda, grøderik eller mager? Veks det tre der eller ikkje? Ver modige og ta med noko av førstegrøda i landet!» Det var tida for dei første druene.

²¹[29] Så tok dei av stad og utforska landet frå Sin-ørkenen til Rehob ved Lebo-Hamat.

²²[30] Dei drog opp gjennom Negev og kom til Hebron. Der budde anakittane Ahiman, Sjesjai og Talmai. — Hebron var bygd sju år før Soan i Egypt.

²³[31] Då dei kom til Esjkol-dalen, skar dei av ei vinranke med ein drueklase. To mann bar han på ei stong. Dei tok òg granateple og fikenar.

²⁴Den staden vart kalla Esjkol-dalen, etter den drueklasen som israelittane skar av der.

²⁵Då det var gått førti dagar, vende dei attende etter å ha utforska landet.

²⁶Dei kom til Moses og Aron og heile Israels forsamling i Kadesj i Paran-ørkenen. Dei gav rapport til dei og til heile forsamlinga og viste dei frukta dei hadde med frå landet.

²⁷Til Moses fortalde dei: «Vi kom inn i det landet du sende oss til. Det fløymer verkeleg med mjølk og honning, og dette er frukta som veks der.

²⁸Men folket som bur i landet, er sterkt, og byane er festningsbyar og svært store. Der såg vi anakittar òg.

²⁹I Negev bur det amalekittar, i fjellandet bur det hetittar, jebusittar og amorittar, og utmed havet og langs Jordan bur kanaanearane.»

³⁰Kaleb roa ned folket framfor Moses. «Kom, så går vi opp og tek landet i eige!» sa han. «Vi kjem heilt sikkert til å sigra over dei!»

³¹Men dei mennene som drog opp saman med han, sa: «Vi kan ikkje gå til åtak på dette folket, for dei er sterkare enn vi.»

³²Dei sette ut rykte blant israelittane om landet dei hadde utforska. Dei sa: «Det landet vi drog gjennom og undersøkte, er eit land som et opp dei som bur der. Og alle folka vi såg, var storvaksne menn.

³³Der såg vi kjemper òg — anakittane høyrer til kjempene. I eigne auge var vi som grashopper, og det var vi i deira auge òg.»