Read nynorsk 2011 4. Mosebok 14 Bible Online

4. Mosebok 14 - nynorsk 2011 bible

4. Mosebok 14

¹Då braut forsamlinga ut i høge rop, og folket gret den natta.

²Alle israelittane klaga til Moses og Aron. Heile forsamlinga ropa til dei: «Berre vi hadde fått døy i Egypt eller her i ørkenen. Berre vi hadde fått døy!

³Kvifor fører HERREN oss til dette landet så vi må falla for sverd og kvinnene og småborna våre bli krigsbytte? Var det ikkje betre for oss å venda attende til Egypt?»

⁴Og dei sa til kvarandre: «Vi vel ein leiar og vender attende til Egypt!»

⁵Då kasta Moses og Aron seg ned med andletet mot jorda framfor heile Israels forsamling.

⁶[32] Josva, son til Nun, og Kaleb, son til Jefunne, som hadde vore med og utforska landet, reiv sund kleda sine

⁷og sa til heile forsamlinga av israelittar: «Det landet vi drog igjennom og utforska, er eit svært godt og innbydande land.

⁸Om han har si glede i oss, fører HERREN oss inn i dette landet og gjev det til oss, eit land som fløymer med mjølk og honning.

⁹Gjer berre ikkje opprør mot HERREN! De skal ikkje vera redde folket i landet, dei er berre ein brødbit for oss. Skuggen deira har vendt seg frå dei, men HERREN er med oss. Ver ikkje redde dei!»

¹⁰Men heile forsamlinga ropa at dei skulle steinast. Då synte HERRENS herlegdom seg for alle israelittane ved teltheilagdomen.

¹¹Og HERREN sa til Moses: Kor lenge skal dette folket forakta meg? Kor lenge skal dei la vera å tru på meg, endå eg har gjort så mange teikn mellom dei?

¹²Lat meg slå dei med pest og driva dei bort! Og så vil eg gjera deg til eit folk som er større og mektigare enn dei.

¹³Moses sa til HERREN: Egyptarane har høyrt at du med di kraft førte dette folket opp frå landet deira,

¹⁴og dei har fortalt det til dei som bur i dette landet. Dei har høyrt at du, HERRE, er midt iblant dette folket, at du viser deg for dei auge mot auge, HERRE, når skya di står over dei, og at du går føre dei i ei skysøyle om dagen og i ei eldsøyle om natta.

¹⁵Lèt du dette folket døy, alle som ein, då kjem folka som har høyrt ryktet om deg, til å seia:

¹⁶«HERREN makta ikkje å føra dette folket inn i det landet som han med eid hadde lova dei, så han slakta dei ned i ørkenen.»

¹⁷Men no, Herre, vis di store makt, slik du har sagt det:

¹⁸«HERREN er sein til vreide og rik på miskunn. Han tilgjev skuld og lovbrot, men lèt ikkje den skuldige vera utan straff. Han straffar borna i tredje og fjerde ledd for synda til fedrane.»

¹⁹Tilgjev i di store miskunn den synda dette folket har gjort, slik du har tilgjeve dette folket heilt frå Egypt og til no.

²⁰Då sa HERREN: Eg tilgjev dei, slik du bed om.

²¹Men så sant eg lever, så sant HERRENS herlegdom fyller heile jorda:

²²Ingen av desse mennene som har sett min herlegdom og sett dei teikna eg gjorde i Egypt og i ørkenen, og som likevel har sett meg på prøve for tiande gong og ikkje høyrt på det eg har sagt,

²³sanneleg, ingen av dei skal sjå landet eg med eid har lova fedrane deira. Ingen som foraktar meg, skal sjå det!

²⁴Men Kaleb, tenaren min, har ei anna ånd i seg, og han har følgt meg trufast. Difor vil eg føra han inn i det landet han har vore i, og etterkomarane hans skal få ta det i eige.

²⁵[33] Men i dalane bur amalekittane og kanaanearane. I morgon må de snu og dra ut i ørkenen, langs vegen mot Sivsjøen.

²⁶ HERREN sa til Moses og Aron:

²⁷Kor lenge skal denne vonde forsamlinga klaga til meg? Eg har høyrt korleis israelittane klagar over meg.

²⁸Sei til dei: Så sant eg lever, seier HERREN: Som de har ropa meg i øyret, slik skal eg gjera med dykk.

²⁹I denne ørkenen skal lika dykkar bli liggjande, alle de som vart mønstra i manntalet, alle frå tjue år og oppover som har klaga over meg.

³⁰Ingen av dykk skal koma inn i landet som eg med lyft hand svor at de skulle få bu i — ingen utan Kaleb, son til Jefunne, og Josva, son til Nun.

³¹Men småborna dykkar, som de meinte ville falla i fiendehand, dei skal eg føra inn. Dei skal læra å kjenna det landet som de vraka.

³²Men lika av dykk skal bli liggjande her i ørkenen.

³³Og borna dykkar skal vera gjetarar i ørkenen i førti år. Dei skal lida for at de var trulause, til den siste av dykk endar som lik i ørkenen.

³⁴Liksom de utforska landet i førti dagar, skal de bera skulda dykkar i førti år, eitt år for kvar dag. De skal få kjenna min uvilje.

³⁵Eg, HERREN, har sagt at slik vil eg gjera med heile denne vonde forsamlinga som har svore seg saman mot meg. I denne ørkenen skal dei enda sine dagar, her skal dei døy.

³⁶Dei mennene som Moses hadde sendt for å utforska landet, kom att og sette heile forsamlinga opp mot han ved å spreia vonde rykte om landet,

³⁷og desse mennene som sette ut vonde rykte om landet, døydde av pest for HERRENS andlet.

³⁸Av dei mennene som drog for å utforska landet, fekk berre Josva, son til Nun, og Kaleb, son til Jefunne, leva.

³⁹Då Moses fortalde dette til israelittane, vart folket gripe av djup sorg.

⁴⁰Morgonen etter stod dei tidleg opp og gjekk oppover mot høgdedraget. «Kom», sa dei, «lat oss gå opp til den staden HERREN har tala om. For vi har synda.»

⁴¹Men Moses sa: «Kvifor vil de gjera imot HERRENS ord? Dette kjem ikkje til å lukkast.

⁴²Gå ikkje opp dit, for HERREN er ikkje midt iblant dykk. De kjem berre til å tapa for fiendane dykkar.

⁴³For der møter de amalekittane og kanaanearane, og då fell de for sverd! Fordi de har vendt dykk bort frå HERREN, vil han ikkje vera med dykk.»

⁴⁴Likevel var dei trassige og gjekk oppover mot høgdedraget. Men korkje HERRENS paktkiste eller Moses forlèt leiren.

⁴⁵[34] Då kom dei ned, både amalekittane og kanaanearane som budde på dette fjellet. Dei slo israelittane og forfølgde dei heilt til Horma.