Read nynorsk 2011 4. Mosebok 17 Bible Online

4. Mosebok 17 - nynorsk 2011 bible

4. Mosebok 17

¹ HERREN sa til Moses:

²Sei til israelittane at dei skal gje deg tolv stavar, ein stav for kvar stamme. Av leiaren for kvar stamme skal du få ein stav, og på den skal du skriva namnet hans.

³På staven frå Levi skal du skriva Arons namn, for det skal vera ein stav for kvar av leiarane for familiane.

⁴[39] Legg stavane i teltheilagdomen framfor vitnemålet, der eg møter dykk.

⁵Der skal staven til den mannen eg vel ut, setja friske skot. Så blir eg kvitt all klaginga frå israelittane.

⁶Moses tala til israelittane. Og alle leiarane for stammane gav han kvar sin stav, ein stav for kvar stamme, tolv stavar i alt. Mellom dei var staven til Aron.

⁷Moses la stavane ned for HERRENS andlet i teltet med vitnemålet.

⁸Det vart morgon neste dag. Då kom Moses inn i vitnemålsteltet, og sjå, Arons stav, staven for Levis hus, hadde sett friske skot. Han hadde fått knoppar, blømde og bar mandlar.

⁹Moses bar alle stavane bort frå HERRENS andlet og ut til israelittane. Dei såg på dei, og alle tok kvar sin stav.

¹⁰[40] HERREN sa til Moses: «Ber Arons stav inn att og legg han framfor vitnemålet! Den skal takast vare på som eit teikn for dei som vil gjera opprør. Slik skal du stansa murringa deira, så dei ikkje må døy.»

¹¹Moses gjorde dette. Han gjorde slik HERREN hadde pålagt han.

¹²Men israelittane sa til Moses: «Vi går jo til grunne! Vi er fortapte alle saman, vi er fortapte!

¹³Kvar den som vågar å koma nær til HERRENS bustad, døyr. Skal vi gå fullstendig til grunne?»