Read nynorsk 2011 4. Mosebok 22 Bible Online

4. Mosebok 22 - nynorsk 2011 bible

4. Mosebok 22

¹Israel braut opp. Så slo dei leir på slettene i Moab, på den andre sida av Jordan, midt imot Jeriko.

²Balak, son til Sippor, såg alt det Israel hadde gjort med amorittane,

³og i Moab steig redsla for dette folket som var så talrikt. Dei var redde for å møta Israel.

⁴Moab sa til dei eldste i Midjan: «No kjem denne bølingen til å beita ned alt omkring oss her, akkurat som når oksane beiter graset snautt ute på markene.» På den tid var Balak, son til Sippor, konge i Moab.

⁵[57] Han sende bodberarar til Bileam, son til Beor, i Petor, som ligg ved elva i det landet der folket hans budde. Dei skulle be han koma, og seia: «Sjå, eit folk har drege ut frå Egypt. Dei dekkjer landet så langt auga rekk, og dei har slege seg ned beint framfor meg.

⁶No må du koma og forbanna dette folket! Dei er for talrike for meg. Kanskje eg då kan slå dei og driva dei ut av landet. For eg veit at den du velsignar, er velsigna, og den du forbannar, er forbanna.»

⁷Dei eldste i Moab og dei eldste i Midjan tok av stad, og dei hadde spåmannsløn med seg. Då dei kom til Bileam, bar dei fram bodet frå Balak.

⁸Han sa til dei: «Ver her i natt, så skal eg seia dykk det HERREN har sagt til meg.» Så gav Moab-hovdingane seg til hos Bileam.

⁹Gud kom til Bileam og sa: «Kven er desse mennene du har hos deg?»

¹⁰Bileam svara Gud: «Balak, son til Sippor, kongen i Moab, har sendt bod til meg:

¹¹Sjå dette folket som har kome frå Egypt. Dei dekkjer landet så langt auga rekk. Du må koma og forbanna dei for meg! Kanskje eg då kan strida mot dei og driva dei ut.»

¹²Gud sa til Bileam: «Gå ikkje med dei! Du skal ikkje forbanna folket, for det er velsigna.»

¹³Då Bileam stod opp om morgonen, sa han til hovdingane som Balak hadde sendt: «Gå tilbake til landet dykkar! HERREN gjev meg ikkje lov til å følgja med dykk.»

¹⁴Moab-hovdingane tok av stad. Dei kom til Balak og sa: «Bileam ville ikkje vera med oss.»

¹⁵Då sende Balak andre hovdingar, fleire og av høgare byrd enn dei første.

¹⁶Dei kom til Bileam og sa: «Så seier Balak, son til Sippor: Eg bed deg, lat ikkje noko hindra deg i å koma til meg!

¹⁷For eg skal visa deg stor ære, og alt det du bed om, skal eg gjera. Kom no og forbann dette folket for meg!»

¹⁸Bileam svara tenarane til Balak: «Om Balak gav meg alt sølv og gull han har i huset, kunne eg ikkje gå imot det HERREN min Gud seier, korkje i smått eller stort.

¹⁹No bed eg om at de òg må vera her i natt, så får eg vita kva meir det er HERREN vil seia meg.»

²⁰Om natta kom Gud til Bileam og sa til han: «Er desse mennene komne for å henta deg, så stå opp og gå med dei! Men gjer ikkje anna enn det eg seier deg.»

²¹Om morgonen stod Bileam opp, sala eselhoppa si og drog av stad saman med Moab-hovdingane.

²²Då flamma Guds vreide opp fordi han drog, og HERRENS engel stilte seg framfor han på vegen som ein motstandar. Sjølv kom han ridande på eselet sitt i lag med dei to tenarane sine.

²³Då fekk eselet auga på HERRENS engel som stod der på vegen med drege sverd i handa. Eselet tok av frå vegen og gjekk ut på marka. Men Bileam slo eselet for å få det inn att på vegen.

²⁴Sidan stilte HERRENS engel seg på ein smal veg mellom vinmarkene. Det var steingard på begge sider.

²⁵Då eselet såg HERRENS engel, pressa det seg inn til muren og klemde foten til Bileam mot steinane. Då slo han det ein gong til.

²⁶Endå ein gong gjekk HERRENS engel framom og stilte seg på ein trong stad, der det ikkje var plass til å vika unna, korkje til høgre eller venstre.

²⁷Då eselet fekk auga på HERRENS engel, la det seg ned under Bileam. Raseriet flamma opp i Bileam, og han slo eselet med staven sin.

²⁸Då gav HERREN eselet munn og mæle, og det sa til Bileam: «Kva har eg gjort deg? No er det tredje gongen du slår meg.»

²⁹Bileam svara eselet: «Du har halde meg for narr. Hadde eg berre eit sverd i handa, skulle eg drepa deg no!»

³⁰Men eselet sa til Bileam: «Er ikkje eg eselet ditt, som du alltid har ride på, heilt til denne dag? Har eg nokon gong hatt for vane å gjera slikt mot deg?» «Nei», svara han.

³¹Då opna HERREN auga til Bileam, og han såg HERRENS engel som stod på vegen med drege sverd i handa. Straks bøygde han seg og kasta seg ned med andletet mot jorda.

³² HERRENS engel sa til han: «Kvifor har du no tre gonger slege eselet ditt? Sjå, eg har gått ut for å stå deg imot. For eg ser at dette er ei farleg ferd.

³³Eselet såg meg og tok av vegen for meg alle tre gongene. Hadde det ikkje det gjort, ville eg no ha drepe deg, men late eselet leva.»

³⁴Då sa Bileam til HERRENS engel: «Eg har synda! Eg skjøna ikkje at du stod framfor meg på vegen. Om dette er urett i dine auge, skal eg venda heim att.»

³⁵HERRENS engel sa til Bileam: «Følg med desse mennene! Men du må ikkje seia noko anna enn det eg byd deg.» Så følgde Bileam med hovdingane åt Balak.

³⁶[58] Då Balak fekk høyra at Bileam kom, tok han av stad for å møta han i Ir-Moab, som ligg ved Arnon, i utkanten av landet.

³⁷Balak sa til Bileam: «Sende eg ikkje bod gong på gong for å henta deg? Kvifor kom du ikkje? Skulle ikkje eg kunna visa deg ære?»

³⁸Bileam svara: «Sjå, no er eg komen til deg. Og no, kan eg seia kva som helst? Dei orda som Gud legg meg i munnen, dei må eg tala.»

³⁹Så følgde Bileam med kong Balak, og dei kom til Kirjat-Husot.

⁴⁰Balak slakta storfe og småfe og sende til Bileam og dei hovdingane som var med han.

⁴¹Morgonen etter tok Balak med seg Bileam og førte han opp til Bamot Baal. Derifrå kunne han sjå den ytste delen av folkemengda.