Read nynorsk 2011 4. Mosebok 27 Bible Online

4. Mosebok 27 - nynorsk 2011 bible

4. Mosebok 27

¹No kom døtrene til Selofhad fram. Selofhad var son til Hefer, son til Gilead, son til Makir, son til Manasse, Josefs son. Døtrene heitte Mahla, Noa, Hogla, Milka og Tirsa.

²Dei stilte seg opp framfor Moses og presten Elasar og leiarane og heile forsamlinga ved opninga til teltheilagdomen og sa:

³«Far vår døydde i ørkenen, men han var ikkje med i den forsamlinga som sette seg opp mot HERREN, Korahs forsamling. Han døydde på grunn av si eiga synd. Og han hadde ingen søner.

⁴Skal namnet til far vår gå ut av slekta fordi han ikkje hadde nokon son? Lat oss få eigedom saman med farbrørne våre!»

⁵Moses la saka deira fram for HERREN,

⁶og HERREN sa til han:

⁷«Det er rett, det som døtrene til Selofhad seier. Gjev dei eigedom til arv saman med farbrørne deira, og lat farsarven gå over til dei!

⁸Sei til israelittane: Når ein mann døyr sonelaus, skal de la arven etter han gå over til dottera.

⁹Har han inga dotter heller, skal de gje arven til brørne hans.

¹⁰Og har han ikkje brør, skal de la farbrørne hans få arven.

¹¹Men hadde ikkje far hans nokon bror, skal de gje arven etter han til den næraste slektningen hans. Då er den hans eigedom.» Dette skal vera lov og rett for israelittane, slik HERREN påla Moses.

¹²HERREN sa til Moses: «Stig opp på Abarim-fjellet og sjå det landet eg har gjeve israelittane.

¹³Når du har sett det, skal du òg bli sameina med folket ditt, slik som Aron, bror din, før deg.

¹⁴For de sette dykk opp mot mitt ord i Sin-ørkenen den gongen forsamlinga gjorde opprør. Då skulle de ha helga meg for auga på dei ved hjelp av vatnet.» — Det er Meriba-kjelda ved Kadesj i Sin-ørkenen.

¹⁵Moses sa til HERREN:

¹⁶«Må HERREN, som er Gud over livsanden i alt som er av kjøt og blod, setja ein mann over forsamlinga,

¹⁷ein som kan gå føre dei når dei dreg ut og når dei vender heim att, ein som kan føra dei ut og føra dei tilbake, så HERRENS forsamling ikkje skal vera som sauer utan gjetar.»

¹⁸Då sa HERREN til Moses: «Ta Josva, son til Nun, ein mann som det er ånd i, og legg handa di på han!

¹⁹Før han fram for presten Elasar og for heile forsamlinga, og set han inn i tenesta medan dei ser på.

²⁰Gjev han noko av den makta du sjølv har, så heile Israels forsamling må lyda han.

²¹[68] Men han skal gå fram for presten Elasar, som skal bruka urim og søkja avgjerder for han for HERRENS andlet. På hans ord skal dei dra ut, og på hans ord skal dei venda attende, han og alle israelittane saman med han, heile forsamlinga.»

²²Moses gjorde som HERREN påla han. Han tok Josva og førte han fram for presten Elasar og for heile forsamlinga.

²³Og Elasar la hendene på han og sette han inn i tenesta, slik som HERREN hadde sagt gjennom Moses.