Read nynorsk 2011 4. Mosebok 28 Bible Online

4. Mosebok 28 - nynorsk 2011 bible

4. Mosebok 28

¹ HERREN sa til Moses:

²Gjev israelittane dette påbodet og sei til dei: Mine offer av mat, gåveoffer til godange for meg, må de syta for å bera fram for meg til fastsett tid.

³Du skal seia til dei: Dette er gåveofferet som de skal bera fram for HERREN: kvar dag to årsgamle lam utan feil. Det er det daglege brennofferet.

⁴Det eine lammet skal du ofra om morgonen, det andre skal du ofra i skumringa.

⁵Som grødeoffer skal du bera fram ein tiandedels efa kveitemjøl blanda med ein fjerdedels hin olje av knust oliven.

⁶Dette er det daglege brennofferet, som først vart frambore ved Sinai-fjellet, eit gåveoffer til godange for HERREN.

⁷Drikkofferet som høyrer til det første lammet, skal vera ein fjerdedels hin, eit offer sterk drikk som du heller ut for HERREN i heilagdomen.

⁸Det andre lammet skal du ofra i skumringa, og du skal ofra det same grødeofferet og drikkofferet som om morgonen. Det skal vera eit gåveoffer til godange for HERREN.

⁹På sabbatsdagen skal du ofra to årsgamle lam utan feil, og som grødeoffer to tiandedels efa kveitemjøl blanda med olje og drikkofferet som høyrer til.

¹⁰Dette er sabbats-brennofferet, eit brennoffer for kvar sabbat, i tillegg til det daglege brennofferet og drikkofferet som høyrer til.

¹¹[69] På nymånedagane skal de bera fram brennoffer for HERREN: to unge oksar, ein vêr og sju årsgamle lam utan feil.

¹²For kvar okse skal de som grødeoffer bera fram tre tiandedels efa kveitemjøl blanda med olje, for den eine vêren to tiandedels efa kveitemjøl blanda med olje

¹³og for kvart lam ein tiandedels efa kveitemjøl blanda med olje. Det skal vera brennoffer til godange, eit gåveoffer for HERREN.

¹⁴Drikkoffera som høyrer til, skal vera ein halv hin vin for kvar okse, ein tredjedels hin for vêren og ein fjerdedels hin for kvart lam. Dette er nymåne-brennofferet, som skal berast fram kvar nymånedag i året.

¹⁵Ein geitebukk skal de òg ofra som syndoffer til HERREN, i tillegg til det daglege brennofferet og drikkofferet som høyrer til.

¹⁶Den fjortande dagen i den første månaden er det påske for HERREN.

¹⁷Og frå den femtande dagen i same månaden er det høgtid. Då skal det etast usyra brød i sju dagar.

¹⁸Den første dagen skal de halda ei heilag samling. Då må de ikkje gjera noko tungt arbeid.

¹⁹Som gåveoffer, brennoffer for HERREN, skal de bera fram to unge oksar, ein vêr og sju årsgamle lam, og dei må vera utan feil.

²⁰Grødeofferet som høyrer til, skal vera kveitemjøl blanda med olje, tre tiandedels efa for kvar okse, to tiandedels efa for vêren

²¹og ein tiandedels efa for kvart av dei sju lamma.

²²Ein geitebukk skal de bera fram som syndoffer til soning for dykk.

²³Dette skal de ofra i tillegg til den delen av det daglege brennofferet som blir frambore om morgonen.

²⁴Slik skal de bera fram offer dagleg i sju dagar, som mat, som gåveoffer til godange for HERREN. Det skal ofrast i tillegg til det daglege brennofferet, med drikkofferet som høyrer til.

²⁵Den sjuande dagen skal det vera heilag samling for dykk. Då må de ikkje gjera noko tungt arbeid.

²⁶På førstegrødedagen, når de feirar vekefesten og ber fram for HERREN offer av den nye grøda, skal det vera heilag samling. Då må de ikkje gjera noko tungt arbeid.

²⁷De skal bera fram eit brennoffer til godange for HERREN: to unge oksar, ein vêr og sju årsgamle lam.

²⁸Grødeofferet som høyrer til, skal vera kveitemjøl blanda med olje, tre tiandedels efa for kvar okse, to tiandedels efa for vêren

²⁹og ein tiandedels efa for kvart av dei sju lamma.

³⁰Ein geitebukk skal de bera fram til soning for dykk.

³¹Dette skal de ofra i tillegg til det daglege brennofferet med grødeofferet og drikkofferet som høyrer til. Dyra må vera utan feil.