Read nynorsk 2011 4. Mosebok 29 Bible Online

4. Mosebok 29 - nynorsk 2011 bible

4. Mosebok 29

¹[70] Den første dagen i den sjuande månaden skal de halda ei heilag samling. Då skal de ikkje gjera noko tungt arbeid. Det skal vera ein dag då hornet skal ljoma hos dykk.

²De skal bera fram brennoffer til godange for HERREN: ein ung okse, ein vêr og sju årsgamle lam utan feil.

³Grødeofferet som høyrer til, skal vera kveitemjøl blanda med olje, tre tiandedels efa for oksen, to tiandedels efa for vêren

⁴og ein tiandedels efa for kvart av dei sju lamma.

⁵Ein geitebukk skal de bera fram som syndoffer, til soning for dykk.

⁶Dette skal de ofra i tillegg til nymåne-brennofferet og det daglege brennofferet, med grødeofferet og drikkofferet som høyrer til, slik regelen seier. Det skal vera eit gåveoffer til godange for HERREN.

⁷[71] Den tiande dagen i same månaden, den sjuande, skal de halda ei heilag samling. De skal visa måtehald og ikkje gjera noko arbeid.

⁸De skal ofra brennoffer til godange for HERREN: ein okse, ein vêr og sju årsgamle lam, og dei må vera utan feil.

⁹Grødeofferet som høyrer til, skal vera kveitemjøl blanda med olje, tre tiandedels efa for oksen, to tiandedels efa for vêren

¹⁰og ein tiandedels efa for kvart av dei sju lamma.

¹¹Ein geitebukk skal de bera fram som syndoffer, i tillegg til det sonande syndofferet og det daglege brennofferet med grødeofferet og drikkoffera som høyrer til.

¹²[72] Den femtande dagen i den sjuande månaden skal de halda ei heilag samling. Då skal de ikkje gjera noko slags arbeid. I sju dagar skal de feira høgtid for HERREN.

¹³De skal ofra brennoffer, eit gåveoffer til godange for HERREN: tretten unge oksar, to vêrar og fjorten årsgamle lam. Dei skal vera utan feil.

¹⁴Grødeofferet som høyrer til, skal vera kveitemjøl blanda med olje, tre tiandedels efa for kvar av dei tretten oksane, to tiandedels efa for kvar av dei to vêrane

¹⁵og ein tiandedels efa for kvart av dei fjorten lamma.

¹⁶Ein geitebukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

¹⁷Den andre dagen skal de ofra tolv unge oksar, to vêrar og fjorten årsgamle lam utan feil.

¹⁸Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

¹⁹Ein geitebukk skal de bera fram som syndoffer, i tillegg til det daglege brennofferet med grødeofferet og drikkoffera som høyrer til.

²⁰Den tredje dagen skal de ofra elleve oksar, to vêrar og fjorten årsgamle lam utan feil.

²¹Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

²²Ein geitebukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

²³Den fjerde dagen skal de ofra ti oksar, to vêrar og fjorten årsgamle lam utan feil.

²⁴Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

²⁵Ein geitebukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

²⁶Den femte dagen skal de ofra ni oksar, to vêrar og fjorten årsgamle lam utan feil.

²⁷Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

²⁸Ein bukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

²⁹Den sjette dagen skal de ofra åtte oksar, to vêrar og fjorten årsgamle lam utan feil.

³⁰Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

³¹Ein geitebukk skal de bera fram som syndoffer, i tillegg til det daglege brennofferet med grødeofferet og drikkoffera som høyrer til.

³²Den sjuande dagen skal de ofra sju oksar, to vêrar og fjorten årsgamle lam utan feil.

³³Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

³⁴Ein geitebukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

³⁵[73] Den åttande dagen skal de halda ei høgtidssamling. Då må de ikkje gjera noko slags arbeid.

³⁶De skal bera fram brennoffer, gåveoffer til godange for HERREN: ein okse, ein vêr og sju årsgamle lam utan feil.

³⁷Grødeofferet og drikkoffera som høyrer til, skal svara til talet på oksar, vêrar og lam, slik regelen seier.

³⁸Ein geitebukk skal de bera fram som syndoffer, i tillegg til det daglege brennofferet med grødeofferet og drikkofferet som høyrer til.

³⁹Desse offera skal de bera fram for HERREN til fastsette tider, i tillegg til lovnadsoffera og dei frivillige offera, anten det er brennoffer, grødeoffer, drikkoffer eller måltidsoffer.