Read nynorsk 2011 4. Mosebok 34 Bible Online

4. Mosebok 34 - nynorsk 2011 bible

4. Mosebok 34

¹ HERREN sa til Moses:

²Dette skal du påleggja israelittane, dette skal du seia til dei: Når de kjem inn i Kanaan-landet, då er dette det landet de får til eige, landet Kanaan frå grense til grense.

³[78] På sørsida skal de ha frå Sin-ørkenen langsmed Edom. De skal ha grense mot sør frå enden av Saltsjøen mot aust.

⁴[79] Grensa skal svinga sørom Akrabbim-skardet og halda fram til Sin. Så skal ho gå sør for Kadesj-Barnea til Hasar-Addar og derifrå over til Asmon.

⁵[80] Frå Asmon skal grensa svinga ned til Egyptarbekken og enda ute ved havet.

⁶I vest skal de ha Storhavet til grense. Det skal vera grensa dykkar mot vest.

⁷[81] I nord skal dette vera grensa dykkar: Frå Storhavet skal de trekkja grensa opp til Hor-fjellet

⁸og frå Hor-fjellet til Lebo-Hamat. Grensa skal enda ute ved Sedad.

⁹Så skal grensa halda fram til Sifron og enda ved Hasar-Enan. Det skal vera grensa dykkar mot nord.

¹⁰I aust skal de dra opp grensa frå Hasar-Enan til Sjefam.

¹¹Frå Sjefam skal grensa gå ned til Ribla, austafor Ajin, og så nedover til ho når fjellryggen på austsida av Kinneret-sjøen.

¹²Så skal ho følgja Jordan og enda nedmed Saltsjøen. Dette skal vera landet dykkar, med desse grensene omkring.

¹³Moses sa til israelittane: Dette er det landet de skal få til eigedom ved loddkasting, det HERREN har gjeve påbod om at dei ni stammane og den eine halve stammen skal få.

¹⁴For Ruben-stammen med familiar, Gad-stammen med familiar og halvparten av Manasse-stammen har alt teke sine eigedomar.

¹⁵Desse to stammane og den eine halve stammen har teke sin eigedom på andre sida av Jordan, rett imot Jeriko, på austsida, mot soloppgangen.

¹⁶ HERREN sa til Moses:

¹⁷Her er namna på dei mennene som skal skifta landet mellom dykk: presten Elasar og Josva, son til Nun,

¹⁸og så skal de ta ut ein leiar for kvar stamme til å fordela landet.

¹⁹Her er namna på desse mennene: for Juda-stammen Kaleb, son til Jefunne;

²⁰for Simon-stammen Samuel, son til Ammihud;

²¹for Benjamin-stammen Elidad, son til Kislon;

²²for Dan-stammen ein leiar, Bukki, son til Jogli;

²³for Josefs etterkomarar ein leiar av Manasse-stammen, Hanniel, son til Efod,

²⁴og ein leiar av Efraim-stammen, Kemuel, son til Sjiftan;

²⁵for Sebulon-stammen ein leiar, Elisafan, son til Parnak;

²⁶for Jissakar-stammen ein leiar, Paltiel, son til Assan;

²⁷for Asjer-stammen ein leiar, Ahihud, son til Sjelomi,

²⁸og for Naftali-stammen ein leiar, Peda'el, son til Ammihud.

²⁹Det var desse HERREN påla å fordela Kanaan-landet mellom israelittane.