Read nynorsk 2011 Mika 3 Bible Online

Mika 3 - nynorsk 2011 bible

Mika 3

¹ Eg sa: Høyr, Jakobs hovdingar, de leiarar i Israels hus! Var det ikkje de som skulle kjenna retten?

² Men de hatar det gode og elskar det vonde. De riv huda av folk og kjøtet av beina deira.

³ Dei et kjøtet av folket mitt, huda flår dei av dei, og beina deira knuser dei. Dei breier det ut som i ei gryte, som kjøtet i ein kjel.

⁴ Når dei så ropar til HERREN, svarar han dei ikkje. På den tid skal han løyna andletet for dei, for dei har gjort vonde gjerningar.

⁵ Så seier HERREN om dei profetane som fører folket mitt vill, som ropar «fred» berre dei får noko å tyggja på, men lyser heilag krig mot dei som ikkje gjev dei munnen full:

⁶Difor skal det bli natt for dykk — utan syn, og mørker — utan spådom. Sola skal gå ned for profetane og dagen formørkjast omkring dei.

⁷ [7] Då skal sjåarane bli til skamme og spåmennene til spott. Alle skal dei løyna skjegget, for det kjem ikkje svar frå Gud.

⁸ Eg, derimot, er full av styrke ved HERRENS ande, av rett og kraft, så eg kan tala til Jakob om hans brot, til Israel om hans synd.

⁹ Høyr dette, de hovdingar i Jakobs hus, de leiarar i Israels hus, de som avskyr rettferd og krøkjer det som er rett,

¹⁰som byggjer Sion med blod og Jerusalem med urett!

¹¹ Hovdingane hennar dømmer for betaling, prestane tek løn for å undervisa, profetane spår for pengar, og likevel støttar dei seg til HERREN og seier: «Er ikkje HERREN midt iblant oss? Det hender ikkje oss noko vondt.»

¹² Difor: Sion skal pløyast til åker, Jerusalem skal bli til ruin og tempelberget til haugar dekte av skog.