Read nynorsk 2011 Mika 6 Bible Online

Mika 6 - nynorsk 2011 bible

Mika 6

¹Høyr kva HERREN seier: Reis deg, før di sak for fjella, lat haugane høyra di røyst!

²Høyr HERRENS klage, de fjell og de faste grunnvollar på jorda! For HERREN klagar sitt folk, han går i rette med Israel.

³Mitt folk, kva har eg gjort deg? Kva har eg trøytta deg med? Svar meg!

⁴ For eg førte deg opp frå Egypt og fria deg ut frå slavehuset. Eg sende Moses, Aron og Mirjam i spissen for deg.

⁵ Mitt folk, hugs planane kong Balak av Moab hadde, og svaret han fekk av Bileam, son til Beor, på vegen frå Sjittim til Gilgal, så du kan skjøna HERRENS frelsesgjerningar.

⁶ Kva skal eg koma fram for HERREN med når eg bøyer meg for Gud i det høge? Skal eg koma til han med brennoffer, med årsgamle kalvar?

⁷ [12] Bryr HERREN seg om tusenvis av vêrar, titusenvis av oljebekker? Skal eg ofra min førstefødde for mitt brot, mi livsfrukt for mi sjels synd?

⁸ Han har kunngjort for deg, menneske, kva godt er. Og kva krev HERREN av deg? Berre at du gjer rett, viser trufast kjærleik og vandrar audmjukt med din Gud.

⁹ HERRENS røyst ropar til byen, og det er visdom å frykta ditt namn. Høyr, du stamme og forsamling!

¹⁰ Finst framleis urettens skattar i huset til den urettferdige og eit forfalska, forbanna efa-mål?

¹¹Kan eg vera rein med urett vekt og falske vektlodd i pungen?

¹²Dei rike i byen øver vald, innbyggjarane der fer med løgn, ei svikefull tunge har dei i munnen.

¹³ Så skal då eg òg byrja å slå deg, øydeleggja deg for dine synder.

¹⁴ Du skal eta og ikkje bli mett, tom skal du kjenna deg. Den du tek til side, kan du likevel ikkje berga, og den du bergar, gjev eg til sverdet.

¹⁵ Du skal så, men ikkje hausta, pressa oliven, men ikkje salva deg med olje, pressa druer, men ikkje drikka ny vin.

¹⁶ Du har halde Omris forskrifter og handla som Ahabs hus. Etter deira råd har de vandra. Difor skal eg overgje deg til øydelegging og innbyggjarane dine til spott. Vanæra til folket mitt må de bera.