Read nynorsk 2011 Nahum 1 Bible Online

Nahum 1 - nynorsk 2011 bible

Nahum 1

¹Bodskap om Ninive. Boka med syna til Nahum frå Elkosj.

² HERREN er ein nidkjær Gud som tek hemn. HERREN tek hemn og er full av harme. HERREN tek hemn over motstandarane, han held fast på vreiden mot fiendane.

³ HERREN er sein til vreide, makta hans er stor. HERREN lèt ikkje vera å straffa. Hans veg går gjennom kvervelvind og storm, skyer er støvet under føtene hans.

⁴ Han trugar havet og legg det tørt, alle elvar tørkar han ut. No visnar Basan og Karmel, Libanons blomeprakt visnar bort.

⁵ Fjella skjelv for han, høgdene smeltar. Jorda vik bort for hans andlet, verda og alle som bur der.

⁶ Kven kan stå seg for harmen hans, kven held ut den brennande vreiden? Raseriet hans strøymer fram som eld. Framfor han blir knausane knuste.

⁷ HERREN er god, eit vern på trengselsdagen. Han tek seg av dei som søkjer tilflukt hos han.

⁸ [1] Men med ei veldig flodbølgje knuser han staden der ho låg. Han jagar fiendane sine inn i mørkret.

⁹Kvifor legg de planar mot HERREN? Han skal knusa dykk heilt. Nauda skal ikkje koma ein gong til.

¹⁰Lik tornekratt som er fletta saman, lik drankarar som er drukne, blir dei fortærte som knusktørr halm.

¹¹ [2] Frå deg gjekk det ut ein som tenkte ut vondt mot HERREN, ein vondsinna rådgjevar.

¹²Så seier HERREN: Om dei er aldri så sterke og mange, skal dei likevel hoggast ned og bli borte. Om eg har plaga deg, Juda, skal eg ikkje plaga deg lenger.

¹³ For no bryt eg åket og tek det av deg, lenkjene dine riv eg av.

¹⁴ [3] Men om deg har HERREN gjeve bod at inga etterslekt skal bera namnet ditt. Eg vil rydda ut or gudshuset ditt både utskorne og støypte gudebilete. Eg gjer i stand ei grav til deg, for du er verdlaus.